Read Paite Chin PAUNAKTE 27 Bible Online

PAUNAKTE 27 - Paite Chin bible

PAUNAKTE 27

¹Zingchiang thu ah kiuangsak ken; ni’n bang a hon suahpih ding chih lah na thei ngalkei a.

²Midang in nang honphat uhen, nangmah mah kam hilou in; mikhual in nangmah mah mukte hilou in.

³Suang a gik a, piaunel a gik hi; himahleh mihai lungzinna huaite gel sang in a gikzaw hi.

⁴Thangpaihna a gilou, hehna a khel; himahleh thikna ma ah kua ading thei dia?

⁵A langtang a salhna a guk a itna sang in a hoihzaw.

⁶Lawm hon liamsaknate a ginom ahi a: himahleh melma hon tawpna zekhemna ahi.

⁷Kha gilvah in khuaikhak a chimtak a: himahleh kha gilkial ading in thil kha chiteng a khum hi.

⁸Vasa a buk a kipan a vakvai bang in, huai bang in a mun a kipan mi a vakvai hi.

⁹Nuhtheih leh gimnamtui in lungtang a kipaksak a: huai bangmah in mihing lawm khumna lungsimtak a thupha a hongpai ahi.

¹⁰Na lawm mahmah, na pa lawm mangngilh ken; na tuahsiatna ni’n na unau inn ah hoh ken: inveng nai om gamlapi a unau sang in a hoih zaw hi.

¹¹Ka tapa, pil in, ka lungtang kipaksak in, kei hontaite ka dawn theihna ding in.

¹²Mi pilvang in hoihlou a mu a, a bu hi: himahleh mi mawl in a awlmoh kei a, a thuak loh hi.

¹³Mikhual ading mawhkhu dia om puansilh la in; huan numei lamdang adia mawhkhu dia om chiamkhamna ding in len in.

¹⁴Kuapeuh aw ngaihtak a, zingsang a beltak a thou a, vualzawl, amah ading in hamsia a sim ahi ding hi.

¹⁵Vuahchin ni a vuah zu leh numei kinak hat a kibang:

¹⁶Kuapeuh amah khou huih khou bang ahia, khut taklam a sathau ham bang ahi.

¹⁷Sik in sik a hiamsak bang in mihing in a lawm mel a hiamsak hi.

¹⁸Kuapeuh theipi kung kem in huai a a gah a ne ding; huan kuapeuh a pu ngak zahtak in a om ding hi.

¹⁹Tui a maitang in maitang a muh bang in, huai mah bang in mihing lungsim ah mihinna a kimu hi.

²⁰Sheol leh Abaddon a lungkim ngeikei ua, huan mihing mitte a lungkim ngeikei uh.

²¹Huansiangna bel dangka ading ahi, huan meipi dangkaeng ading, huchi bangmah in mihing phatna a ze-et in a om hi.

²²Mihai sum sung ah buh taisate lak ah suk in su mahle chin, huchipiin leng amah a kipan in a haina a paimang kei lai ding hi.

²³Na belamhonte omdan thei ding in thanuam in, na ganhonte hoihtak in en in:

²⁴Hauhsaknate tangtawn a ding ah kei a; lallukhu in suan tengteng a daihzou hia?

²⁵Buhpawl puak in a om a, huan loupa nou a kilang, mualte a loupate a ki lakhawm ahi.

²⁶Belamnoute’n na puansilh ding honpe ding, huan kelte’n na lou man ding:

²⁷Huan na an ding in, na inkawte an ding in kel nawitui kiching a om ding hi; huan na nungakte vakna ding in.