Read Paite Chin PAUNAKTE 28 Bible Online

PAUNAKTE 28 - Paite Chin bible

PAUNAKTE 28

¹Migilou kuamah delhlouh in a tai: himahleh mi diktat humpinelkai bang in a hangsan hi.

²Gam tatlekna ziak in thunei mi tampi om a: himahleh theisiam leh theihna nei mite ziak in huai gam bel suk vaiveng theih ahi.

³Taksap hau mi genthei nuaisiahte zaw lou susia vuahpi zu bang ahi.

⁴Amau dan mangngilhte’n migilou a phat ua: himahleh huchibang dan zuite amau tung ah a thangpai uhi.

⁵Mi hoihlou in vaihawmna a theisiam kei: himahleh amau TOUPA zongte’n thil tengteng a theisiam uh.

⁶A lampite a hoihlou mihau sang in a thutakna a om mi genthei a hoih zaw hi.

⁷Kuapeuh dan zui tapa pil ahi: himahleh kuapeuh anhai mite toh kithuah in a pa a zumsak hi.

⁸Kuapeuh a neih a nou leh a pung a tamsak in mi genthei hehpihmi amah ding in a lakhawm hi.

⁹Kuapeuh dan zalou ding a a bil kaihei a thumna nasan kihhuai ahi.

¹⁰Kuapeuh lampi gilou a midik lamhaihsak, amah kawkhuk mahmah ah a kelut ding hi: himahleh mi hoihkim in gou hoih a luah ding hi.

¹¹Mi hausa amah ngaih in a pil a; himahleh mi genthei theihsiamna nei in amah a zongkhia hi.

¹²Mi diktat a vualzoh chiang in, thupina lian a om: himahleh migilou a thoh chiang in, mite a bu uhi.

¹³Kuapeuh a tatlekna khuh a lohching kei ding: himahleh kuapeuh huaite thupha tawi a mangngilh in chitna a mu ding uh.

¹⁴Lauthei gige mi a hampha hi: himahleh a lungtang saksak gige siatna ah a ke ding hi.

¹⁵Humpinelkai humham leh vompi hawk bang in; huai mah bang in mi gentheite tung a vaihawmmi gilou ahi.

¹⁶Vaihawmmi theihsiamna tasam nuaisiah hatmi thupi ahi: himahleh kuapeuh huaihamna hua in a nite a sausak ding hi.

¹⁷Mi kuapeuh mi himhim sisan a dim kawkhuk sung ah a tailut ding; kuapeuh in len kei hen.

¹⁸Kuapeuh tangtak a om suahtaksak in a om ding: himahleh kuapeuh a lampite a hoihlou a pukzaw ding hi.

¹⁹Kuapeuh a gam leilet in tanghou tampi a nei ding: himahleh kuapeuh mi bangmahlou nungzui in gentheihna kiching a nei ding hi.

²⁰Mi ginom in vualzawlna a hau ding: himahleh kuapeuh hau ding a kintat gawtlouh in a omkei ding hi.

²¹Mite deihsaktuam neih a hoih kei: tanghou them ziak in mi a talek ding leng ahi sam kei hi.

²²Kuapeuh deihgawl sumchit hauhsakna delh in a kinoh a, huan a tung ah taksapna a hongtung sin chih a theikei hi.

²³Kuapeuh mi deihsakna a sal in a lei a maitangphathatmi sang in deihsakna tamsem a nung in a mu ding hi.

²⁴Kuapeuh a nu hiam a pa hiam lok a, tatlekna ahi kei, chi mi zaw; amah mah hihsemi kithuahpih ahi hi.

²⁵Kuapeuh lungsim duhgawl in kinakna a tokthou hi: himahleh kuapeuh TOUPA a muanna koih thausak in a om ding hi.

²⁶Kuapeuh amah lungtang muang mihai ahi: himahleh kuapeuh piltak a om, suahtaksak in a om ding hi.

²⁷Kuapeuh genthei kiang a pia a tasam kei ding a: himahleh kuapeuh a mitsel in hamsia tampi a nei ding hi.

²⁸Migiloute a lal chiang un, mite a kibu ua: himahleh a manthat chiang un, mi diktat a pung hi.