Read Paite Chin PAUNAKTE 3 Bible Online

PAUNAKTE 3 - Paite Chin bible

PAUNAKTE 3

¹Ka tapa, ka dan mangngilh ken; himahleh ka thupiakte na lungtang in kem hen:

²Nite sawtna leh, damsung kumte leh muanna, nang a hong kibehlap ding ahi ngal a.

³Chitna leh thutak in nang hon nuse kei hen: Na ngawng kimvel in vial inla; na lungtang dohkan tung ah amaute gelh in:

⁴Huchi in Pathian leh mihing mitmuh in deihsakna leh theihsiamna hoih na mu ding hi.

⁵Na lungtang tengteng toh TOUPA ah muang inla, nangmah theihsiamna ah kinga ken:

⁶Na lampi tengteng ah amah thei inla, huchi in aman na lampite a pitang ding hi.

⁷Nangmah mit ah pil kenla; TOUPA kihta inla, gilou taisan in:

⁸Na lai ading in damna ahi ding a, na guhte ading in guhngek.

⁹Na van in Toupa zahtak in, na punna tengteng a gahmasate toh in:

¹⁰Huchi in hauhna in na pangte a dimlet dia, na belte uain thak in a dimlet ding hi.

¹¹Ka tapa, TOUPA sawina musit kenla; a salhna leng chimtak sam ken:

¹²Pa’n a kipahna tapa a salh bang in. TOUPA’N a itte a sal ngal a;

¹³Pilna mu mi leh theihsiamna mu mi’n nuam a sa hi.

¹⁴Huai a vante lah dangka vante sang in a hoihzaw ngal a, huan huai a punna dangkaeng hoih sang in.

¹⁵Rubi suang sang in a manpha zaw: huan amah toh na thil deihte na tehpih theikei ding.

¹⁶A khut taklam ah nite sawtna a om a; a khut veilam ah hauhsaknate leh zahtakhuaina.

¹⁷A lampite nuamna lampite ahi a, a lampite tengteng muanna ahi.

¹⁸Amah lenchintente ading in hinna sing ahi: amah neiden michih in nuam a sa uhi.

¹⁹TOUPA’N pilna in lei a mukhia a; theihsiamna in vante a hihkipta hi.

²⁰A theihna in thuknate a kitam a, huan vante’n a daitui a taksak uhi.

²¹Ka tapa, na mitte a kipan amaute paimang sakken; pilna hoih leh ngentelna kem gige in;

²²Huchi in na kha ading in hinna ahi ding ua, na ngawng ading in kilawmna.

²³Huchi in bittak in na lampi ah na pai ding a, na khe a kisui kei ding hi.

²⁴Na lup chiang in, na lau kei dia: ahi, na lum ding a, na ihmut a lim ding.

²⁵Lauguihna kihta ken, a hongpai chiang in, giloute hihgawpna leng lau sam ken:

²⁶TOUPA na muanpi ahi sin ngal a, na khe thang a awklou ding in a veng ding hi.

²⁷A mudingte a kipan thil hoih it ken, hih ding a na khut thilhihtheihna a omlai in.

²⁸Na invengte kiang ah, na kiang a na neih lai in, pai inla, hong nawn in, huchi in zingsang chiang in k’on pe ding, chi ken.

²⁹Na invengte siatna ding gilou ngaihtuah ken, na kiang ah bittak in a teng chih thei in.

³⁰A ziak bei in mi toh kina ken, gilou bangmah na tung a ahihkei leh.

³¹Hiamgamna mi eng ken, a lampite lak a bangmah tel ken.

³²Kilawmlou lah TOUPA ading in kihhuai ahi ngal a: himahleh a thuguk mi tangte kiang ah a om hi.

³³TOUPA hamsia migiloute inn ah a om; himahleh mi diktatte tenna a vualzawl hi.

³⁴Aman nuihsanhatte a nuihsana, himahleh kingainiamte kiang ah hehpihna a pia hi.

³⁵Mi pil in thupina gou a luah ding; himahleh zumna mihaite kaisanna ahi ding hi.