Read Paite Chin PAUNAKTE 30 Bible Online

PAUNAKTE 30 - Paite Chin bible

PAUNAKTE 30

¹Massa mi Jakeh tapa Agur thute: Huai mi in Ithiel kiang ah, Ithiel leh Ukal kiang ah:

²Chihtaktak in kuamah sang in ka haizaw a, mihing theihsiamna ka neikei:

³Pilna ka sin naikei a, Mi Siangthou theihna leng ka neikei, a chi.

⁴Van ah kua a kahtouta in a hong kumsuk a? A khuttum sung ah kua’n huih a lakhawmta a? A puansilh in kuan tuite a tun a? Lei tawpnate kuan a hihkipta a? A min bang ahia? Huan a tapa min bang ahia, na theih leh?

⁵Pathian thu chiteng ettel ahi: amah a muangte ading in lum ahi.

⁶A thute ah behlap ken, a honsal dia, zuauthei a muh in na omkha ding hi.

⁷Thil nih k’on ngen: ka sih ma in huaite hon kitheihmohbawl ken:

⁸Bangmahlou leh zuau kei a kipan gamlapi ah suan in: Gentheihna hiam hauhsaknate hiam hon peken: kei adia kiphamoh an in honvak in.

⁹Huchilou in zaw ka kham in, nang k’on kitheihmohbawl in, TOUPA kua ahia? Ka chi kha ding hi. Ahihkeileh, ka genthei in, ka gu in, ka Pathian min thanghuaitakin ka bawl kha ding hi.

¹⁰A pu kiang ah sikha gense ken, huchilou in zaw nang a hon hamsiat dia, mawhtansak in na om ding hi.

¹¹A pa uh hamsiat suan khat a om a, a nu uh vualzawl lou.

¹²Amau mitte a siangthou suan khat a om a, ahi a lah a nitna ua kipan silsiang louh ahi uhi.

¹³Suan khat a om a, Aw a mitte uh sanghah hina e: huan a mitkhu vunte sansak in a om hi.

¹⁴A hate uh namsau bang, leh a hate uh temta bang suan khat a om uh, lei a kipan a mi genthei leh, tasamte mite lak a kipan a nekbeina ding in.

¹⁵Vot in tanu nih a nei a, honpia in, honpia in, chi in kikou ua. Thil thum lungkimsak theih ngeilouh a om uh, ahi, li, Hun e, chi lou:

¹⁶Han leh sul hut; lei tui a hih lungkima omlou; huan mei, hun e chi lou.

¹⁷Mit a pa nuihsan leh, a nu thuman musit, guam va-akte’n a tawm ding ua, muvanlai noute’n a ne ding uhi.

¹⁸Thil thum kei ading a lamdang lua a om ua, ahi, ka theihlouh li:

¹⁹Huihkhua a muvanlai lampi; suangpi tung a gulpi lampi; tuipi lak a long lampi leh pasal nungak toh a lampi.

²⁰Huai mah bang in angkawmhat numei lampi ahi; a ne a, zapi in a kam ka a, gitlouhna ka hihkei, a chi hi.

²¹Thil thum ziak in lei a ling a, huan thil li a puak zohlouh ziak in;

²²Sikha kumpipa hong hihlai leh mihai ankham lai;

²³Numei huathuai tak in pasal a neih a, sikha nungak in a pi a luah in.

²⁴Leitung ah a neu thil li a om ua himahleh a pil mahmah uh:

²⁵Miksite hatlou ganhing hon ahi ua, himahleh nipi lai in a nekding uh a sutuah ua;

²⁶Kawlsazawte hatlou pawl tak ahi ua, himahleh suangpi heng ah a inn a bawl uhi:

²⁷Khaukhupte’n kumpipa a neikei ua, himahleh a honhon in avek un kilem in a pai uh;

²⁸Inhikte na khut a na tawi theih ahi ua; himahleh kumpipate inpite ah a teng uh.

²⁹A paichiang ua thupi thil thum a om ua, ahi, a pai chiang ua thupi, li:

³⁰Humpinelkai, gamsa laklak a hatpen pen, bangmah ma ah a kiheimang kei hi;

³¹Kidouna sakol; keltal leng; huan kumpipa, a mite ma a pai.

³²Na kiletsak a haitak a na gamtat leh, ahihkeileh ngaihtuahna gilou na neih leh, na kam tung ah na khut koih in,

³³Nawitui pei in nawitui dat a omsak a, nak hekin sisan a suahkhe sak: huchi mah bang in thangpaihna paisuak in kilaina a omsak hi.