Read Paite Chin PAUNAKTE 31 Bible Online

PAUNAKTE 31 - Paite Chin bible

PAUNAKTE 31

¹Kumpipa Lemuel thute; a nu’n amah a thuhilh thu:

²Bang ahia, ka tapa? Bang ahia, Aw ka sul tapa? Huan bang ahia, Aw ka thuchiam tapa?

³Na hatna numeite kiang ah pe kenla, kumpipate hihsete kiang ah leng na lampite pe sam ken.

⁴Kumpipate ading ahi kei, Aw Lemuel, uain dawn kumpipate ading ahi kei; Zu khauh koi a om ahia, chih leng lalte ading ahi sam kei.

⁵Huchilouin zaw a dawn un, dan a mangngilh un, gimthuak kuapeuh vaihawmna a kaikawi kha ding uh.

⁶Mangthang dia mansa kiang ah zu khauh pia un, kha a haksa sa kiang ah uain:

⁷Dawnsak unla, a gentheihna mangngilh sak un, a haksatna theigige nawn kei hen.

⁸Pautheilou ading in na kam ka in, sukgawpa om mi huchibangte tengteng thu ah.

⁹Na kam ka inla, diktak in vaihawm in, gentheite leh tasamte kiang ah vaihawmsak in.

¹⁰Numei hoih kua’n a mu dia? A man rubi suang tungpek ah a om hi.

¹¹A pasal lungtang in amah a muanga, punna taksapna a neikei ding hi.

¹²A damsung niteng in amah a hihhoih a, a hihse kei.

¹³Samul leh jija a zong a, a khut in kilawptakin na a sem hi.

¹⁴Sumsinmi longte bang ahia: gamla a kipan in a an a hontawi a.

¹⁵Zan ahihlai in leng a thou a, a sikhanute kiang ah a sep ding uh, a inkawte an a pia hi.

¹⁶Lou a ngaihtuah a, a lei a; a khut a gahte in grephuan a bawl hi.

¹⁷Hatna in a kawng a gak a, a khutte a hatsak hi.

¹⁸A sumsinna vante a phatuam chih a mu a; zan in a khawnvak a mit kei hi.

¹⁹A khutte muikhut ah a nga a, a khutte mui ah a nga hi.

²⁰Gentheite lam ah a khut a zak a; ahi, tasamte lam a sawk hi.

²¹A inkawte ziak in vuk a kihta kei a; a inkawte tengteng puan sanau in a kithuam uhi.

²²Puanphah zehoih mantam a kibawla; a puansilh puanmalngat leh san-dup ahi.

²³Kongpite a gam a upate lak a a pasal a tut chiang in mite’n a theituam in a om hi.

²⁴Puan hoih puansilh a bawl a, a zuak a; sumsinmi kiang ah kawnggakte a pekhia hi.

²⁵Hatna leh zahtakna a puansilh ahi; huan hun hongtung ding a nuihsan hi.

²⁶Pilna in a kam a ka a; siamna dan a lei ah a om hi.

²⁷A inkawte lampi hoihtak in a en a, huan thadahna tanghou a nekei hi.

²⁸A tate a thou ua, amah nuamsa a chi uhi; a pasal in leng, amah a phat hi.

²⁹Tanu tampite’n hoihtak in a hih ua, himahleh nang zaw amaute tengteng na khup vek hi, chi in.

³⁰Deihsakna khemna in a dim a, huan kilawmna bangmahlou ahi: himahleh numei TOUPA laudan siam, phat in a om ding hi.

³¹A khut a gahte amah pia un; huan kongpite ah a thilhihte’n amah phat hen.