Read Paite Chin PAUNAKTE 4 Bible Online

PAUNAKTE 4 - Paite Chin bible

PAUNAKTE 4

¹Tate aw, pa hilhna za un, theihsiam na thei ding in limsak un:

²Thuginpi hoih k’on pe ngal a; ka dan taisan kei un.

³Ka pa ding in tapa ka hi a, ka nu mitmuh a nunnem leh ithuai pen ka hi.

⁴Huan a hon sinsak a, ka kiang ah, na lungtang in ka thute lenden hen; ka thupiakte zui inla, huchi in hing in:

⁵Pilna nei in, theihsiamna nei in: mangngilh ken, ka kam a thute a kipan lunglel ken:

⁶Huai mangngilh kenla, nang a honhawi ding a; amah it inla, aman a honkem ding hi.

⁷Pilna thil pipen ahi; huaiziak in pilna la in: ahi, na muhsa tengteng toh theihsiamna la in.

⁸Amah pahtawi inla, a man nang hon kaisangsak ding: pahtawina a hontun dia, amah na kawi lai in.

⁹Na lu ading in kilawmna kizepna a honpe dia: kilawmna lallukhu nang a honpe ding hi.

¹⁰Aw ka tapa, ka gente za inla, sang in; huchi in na damsung kumte a tam ding hi.

¹¹Pilna lampi ah k’on kisinsakta a; lampi tangte ah k’on pita hi.

¹²Na pai chiang in, na kalsuante haksa in a omkei dia; na tai leh, na kisui puk kei ding.

¹³Hilhna kiptak in len in; paisak ken: amah vom in; amah lah na hinna ahi ngal a.

¹⁴Migiloute lampi ah lut ken, gilou mite lampi ah pai ken.

¹⁵Pel khia inla, a kiang ah paiken; kiheisan inla, pai vengveng in.

¹⁶Poi a khoih kei ngal uleh, a ihmu ngal kei ua; kuahiam a puksak kei uleh, a ihmutna uh lakmang in a om hi.

¹⁷Gitlouhna tanghou lah a ne ngal ua, hiamgamna uain a dawn uhi.

¹⁸Himahleh mi diktatte lampi khovak tung bang ahi, sunlaitak a ni bang a tangpha semsem.

¹⁹Migiloute lampi khomial bang ahi: a kisuihna uh a theikei uhi.

²⁰Ka tapa, ka thute limsak in; ka gente ah na bildoh in.

²¹Na mitte a kipan amaute lamang ken; na lungtang lak ah vom in.

²²Amau mute ading in hinna ahi ngal ua, a sa uh ading in damna.

²³Thanopna tengteng toh na lungtang kem in; huai a kipan lah hinna tuinakte a luang ngal a.

²⁴Nang a kipan kam hoihlou koihmang inla, nang a kipan in muk kilawmloute gamlapi ah koih in.

²⁵Na mitte’n tangtak in en uhenla, na etna na ma ah tang hen.

²⁶Na khe lampi pheisak inla, huan na lampi tengteng hihkip in omsak in.

²⁷Na khut taklam hiam veilam hiam ah pial ken: gilou lampi ah paiken.