Read Paite Chin PAUNAKTE 5 Bible Online

PAUNAKTE 5 - Paite Chin bible

PAUNAKTE 5

¹Ka tapa, ka pilna limsak in; ka theihsiamna na bildoh in:

²Ngentelna na vom theih a, na mukte’n theihna a kep theihna ding un.

³Numei lamdang mukte’n lah khuaizu a tak khesak ngal a, a kam sathau sang in a nal zaw:

⁴Himahleh a tawpna nanung gamsai bang in a kha a, namsau hiamtuah bang in a hiam hi.

⁵A khete sihna lam ah a paisuk a; a kalsuante’n Sheol zuan in a len chinten;

⁶Huchi in hinna lampi phei a mu kei hi: a lampite a kipkei a, aman a theikei hi.

⁷Huaiziak in tuin, ka tapate, hon ngaikhia unla, ka kam a thute a kipan pai mang kei un.

⁸Amah a kipan in na lampi gamlapi ah suanmang in, a inn kongkhak nai ah hongpai ken:

⁹Huchilou in zaw midangte kiang ah na zahtakhuaina na pe kha ding a, na kumte gilou kiang ah:

¹⁰Huchilou in zaw na hatna in mikhualte a vah kha ding ua, gamdang mi inn ah na sepgimnate a om kha ding;

¹¹Huan, na sa leh na pumpi hihgawp a a omlai in na tawpna nanung ah na sun kha ding:

¹²Huchi in, hilhna za nuamlou hina tel ing e, ka lungtang in salhna na musit natel e, na chi kha ding;

¹³Hon sinsakmite aw ka mangkei a, kei honhilhte lam leng ka bil in ka na dohkei:

¹⁴Omkhawmte leh kikhawmpite lak ah gilou tengteng ah siatna ka na hita mahmah hi.

¹⁵Nangmah tuibem a kipan tuite dawn in, nangmah tuileh a kipan tuiluang laite.

¹⁶Na tuinakneite sukthanghuai gawp a om ding hia, kongzingte ah na luite?

¹⁷Nangmah ading kia hi uhenla, nang kiang a mikhualte ding hilou in.

¹⁸Na tuikhuk vualzawl in om hen; huan na tuailai zi ah kipak in.

¹⁹Deihhuai sazukpi leh heksiam sakhipi bang. A itna leh ngaihnatna in chiklaipeuh in leng nang hon lungkimsak gige hen; huan a itna a vak in om gige in.

²⁰Bangziak in ahia, ka tapa, numei lamdang vak a om a, mikhual ang va kawi ding na hia?

²¹Mihing lampite lah TOUPA mit ma ah a om ngal a, aman a lampite tengteng a pheisak hi.

²²Giloute amah thulimlouhnate’n aman ding a, a khelhna guite a kan in a om ding hi.

²³Hilhna taksap ziak in a si ding a; a haina thupina ah a paimang ding hi.