Read Paite Chin PAUNAKTE 6 Bible Online

PAUNAKTE 6 - Paite Chin bible

PAUNAKTE 6

¹Ka tapa, na inveng adia mawh khu dia na din leh, mikhual ading a na khut na kichiam leh,

²Na kam a thute a awk na hih a, na kam a thute a mat na hihleh,

³Tuin hiai hih in, ka tapa, nang leh nang ki honkhia in, na inveng khut sung ah na om chih thei in; kuan in, nang leh nang kiniamkhiak inla, na inveng va ngen ngutngut in.

⁴Na mitte ihmusak kenla, na mitvunte leng lususak sam ken.

⁵Gamvakpa khut a sakhipi bang leh thangkampa khut a vasa bang in ki honkhia in.

⁶Miksi kiang ah hoh in, nang thadah; a lampite ngaihtuah inla, pil in:

⁷Hausa, heutu, hiam vaihawmmi, neilou in,

⁸Nipi chiang in a an a sutuah ua, pawltak chiang in a an a kaikhawm hi.

⁹Bang tan ihmu ding na hia, aw thadah? Na ihmutna a kipan chikchiang a thou ding na hia?

¹⁰Neukha ihmut lai, neukha lusuk, ihmu ding a neukha khutte khep:

¹¹Huchi in na gentheihna guta bang in a hongpai dia, huan na taksapna mi kigalvan bang in.

¹²Mi phatuamlou, migilou; kam kiuangsak toh a vak a;

¹³A mitte in chiamtehna a bawl a, a khete in thu a gen a, a khutzungte in chiamtehna a bawl;

¹⁴A lungtang sung ah hoihlouhna a om a, gilou a gel gige; kilemlouhna a tuh naknak hi.

¹⁵Huaiziak in a tuahsiatna thakhat in a hongtung dia; thakhat a kekgawp in, hihdamna bei in a om ding hi.

¹⁶Toupa’n a muhdah thil guk a om a; ahi, amah adia kihhuai sagih a om hi:

¹⁷Mit ki uangsakte, lei zuauthei, mi hoih sisan suah khutte;

¹⁸Ngaihtuahna gilou ngaihtuah lungtang, siatna hih ding a kintaite;

¹⁹Zuau thugen palai taklou, leh unaute lak a kilemlouhna tuh.

²⁰Ka tapa, na pa thupiak zui in, huan na nu dan mangngilh ken:

²¹Na lungtang tung ah vial gige inla, na ngawng kim ah gak in.

²²Na vak chiang in, nang a honpi ding: na ihmut chiang in, nang a honveng ding hi; huan na khanloh chiang in, nang a hon houpih ding.

²³Thupiak lah khawnvak ahi ngal a: huan dan vakna ahi; huchi in hilhna taihilhna hinna lampi ahi:

²⁴Numei gilou a kipan leh mikhual lei maitang phatna a kipan in nang honkem ding hi.

²⁵Na lungtang in a kilawmna lunggulh ken; a mitvunte in nang hon man kei hen.

²⁶Numei kizuaknu ziak in pasal tanghou them a mat in a om hi: huchi in angkawmnu’n hinna manpha a zongsek hi.

²⁷Mi’n a angsung ah mei a la thei diam, a puante a kangkei diam?

²⁸Ahihkeileh mi suangkuangthei sa tung ah a vak thei diam, a khete a kang kei diam?

²⁹Huchibang in kuapeuh invengte zi zuan; kuapeuh amah khoih gawtlouh a omkei ding.

³⁰Guta in a gilkial ziak a a lunggulhna taisak ding kia a a guk leh mite’n guta a musit kei uhi.

³¹Himahleh muh a a om leh, a zah sagih in adin ding; a inn a van tengteng a pe ding hi.

³²Kuapeuh angkawm theihsiamna bei ahi: amah kha hihse ding a a hih ahi.

³³Liamnate leh zumhuaite a mu ding; huan a zahpihhuaina nulmang ahi kei ding.

³⁴Mullitna lah mi thangpaihna ahi ngal a; huchi in phulak ni chiang in a hawikei ding hi.

³⁵Tatna a limsak kei ding a; thilpiak tampi pe lechin leng, lungdam in a omkei ding hi.