Read Paite Chin PAUNAKTE 7 Bible Online

PAUNAKTE 7 - Paite Chin bible

PAUNAKTE 7

¹Ka tapa, ka thute kem in, na kiang ah ka thupiakte kholkhawm in;

²Ka thupiakte kem inla hing in; huan ka dan na mittang bang in

³Na khutzungte tung ah vial inla; na lungtang suangpek tung ah gelh in.

⁴Pilna kiang ah, ka sanggamnu na hi, chi inla, theihsiamna na tanaunu chi in:

⁵Numei lamdang a kipan nang a honkep theihna ding un, a thute a maitangphatnu mikhual a kipan.

⁶Ka inn tohlet apan ka dak khia a, tohlet vang kal ah ka en paisuak a;

⁷Huan mi mawlte lak ah ka en a, tuailaite lak ah ka theikak a, tangval theihsiamna beipa,

⁸A omna ning chin a kongzing a paisuak a, a inn lam zuan a pai zel pa;

⁹Khomui in, nitaklam in, zan mial bikbek leh khomial ah.

¹⁰Ngai in, numei khat, kizuak puansilh silh, lungtang kiva in a kituahpih a.

¹¹Amah ahi lawlaw a, a tum tuntun a; a khe a inn ah a om ngeikei:

¹²Kongzing a omton a om a, mun liante a a omton a om a, ning chiteng a bukzel hi.

¹³Huchi in amah a manta a, amah a tawpta a, zummoh maitang toh in a kiang ah:

¹⁴Lemna kithoihnate ka kiang ah a om; tuni in ka thuchiamte ka peta hi,

¹⁵Huaiziak in nang tuak ding in ka hong paikhia a, na mel thanuamtak a zong ding in, k’on muta hi.

¹⁶Ka tutna nuam pialkhang phah zehoihte a zep, ka phah khinta, Aigupta khau puangialte toh.

¹⁷Ka lupna murra, aloe, leh sinamon in ka namtui sakta hi.

¹⁸Hongpai in, zingsang matan i itna dimset i la ding; itna in i kilungmuan tuah ding.

¹⁹Ka pasal lah inn ah a om ngalkeia, khual gamla ah a zin hi:

²⁰Sum ip a kitawia; kha a lik chian inn ah a hongpai ding, a chi hi.

²¹A thugen siamna in amah a kipesakta a, a muk a maitang phatnate in amah a sawlmangta hi.

²²Amah a zuipaha, gohdinga bawngtal a pai bang in, leh mihai bawlhoihna dia sikkhau khihmi bang in;

²³Thal in a sin a kap pailet tan; thanglam a vasa a kintat bang in, huai tuh a hinna gun a hih a theikei hi.

²⁴Tuin, ka tapate, huaiziak in hon ngaikhia un, ka kam a thute limsak un.

²⁵Na lungtang amah lampi lam ah awn kei henla, lampite lam ah paimang kei hen.

²⁶Amah lah tampi liamsa in a pai lumletta a: ahi, a thahsate mi hat tampi ahi uh.

²⁷A inn Sheol zotna lampi ahi, sihna dantante zuan a suk pai.