Read Paite Chin PAUNAKTE 8 Bible Online

PAUNAKTE 8 - Paite Chin bible

PAUNAKTE 8

¹Pilna a kikou in, theihsiamna in a aw a suah kei maw?

²Lampi a mun sangte tung ah, lampite kisutna ah, ading a;

³Kongpite biang ah, khopi lutna ah, kongkhakte a pailutna ah, nakpi’n a kikou hi:

⁴Noute, aw mite, ka sam: huan ka aw mite tapa kiang ah ahi.

⁵Aw nou mi mawlt, kivensiamna theisiam un; nou mihaite, lungtang theisiam nei un.

⁶Za un, thil hoihpente gen ding ka hi ngal a; huan ka mukte honna thildikte ahi ding hi.

⁷Ka kam in thutak gen ding ahi ngal a; gitlouhna ka muk a ding in kihhuai hi.

⁸Ka kam a thute teng diktatna ah a om; huaite ah bangmah a diklou a omkei hi.

⁹A theisiam kuapeuh ading in a kichian a, theihna mu amaute ading in a dik hi.

¹⁰Ka hilhna sang unla, dangka hilou in; dangkaeng hoihpen sang in theihna.

¹¹Rubi suang sang in pilna a hoihzaw hi; huan deihhuai thilte tengteng huai toh tehpih theih ahi kei uh.

¹²Kei pilna in kivensiamna ka tenna ding in ka bawl a, theihna leh theihkakna ka mu hi.

¹³TOUPA kihtak a gilou huat ding ahi; kisaktheihna leh, kiotsakna, gilou lampi leh kam hoihlou, ka hua hi.

¹⁴Thupha kei a ahi, theihna hoih: theihsiamna leh hatna ka nei hi.

¹⁵Kei ziak in kumpipate’n vai a hawm ua, lalte’n dikna thu a pia uh.

¹⁶Kei ziak in lalte’n vai a hawm ua, miliante leh lei a vaihawmte tengteng in.

¹⁷Kei hon itte amau ka it a; kuapeuh honzong in honmu hi.

¹⁸Hauhna leh zahna ka kiang ah a om; ahi, sawtdaih hauhna leh diktatna toh.

¹⁹Ka gah dangkaeng sang in a hoihzaw, ahi, dangkaeng hoih sang in; ka sum muhna dangka hoihpen sang in.

²⁰Diktatna lampi ka zui a, vaihawmna lampite lak ah:

²¹Kei hon itte van ka luahsak theih a, a goubawm uh ka dimsak theihna ding in.

²²Toupa’n a lampi kipattung in a honnei a, nidang a a thilhihte ma in.

²³Tangtawn a kipan, a tung a kipan leh lei omma apan koih kip ka hi.

²⁴Thuknate a omlouh lai in, lakkhiak in ka om a; luikhuk tui a dimte a omlouh lai un.

²⁵Mualte a omkip ma in, tangte omma in lakkhiak in ka om:

²⁶lei leh gam bawlkhiak ahihma in, khovel leivui a bawl nailouh lai in.

²⁷Vante a hihkip lai in, huai ah ka om: tui thuk maikaih a tehna a koih lai in:

²⁸Tung a vante a bawlkip lai in: tui thukte tuikhukte a honghat lai un:

²⁹Tuipi kiang a a gi a piaklai in, huchi a tuite’n a thupiak tung a a tatlek louhna ding un: lei suangphumte a chiamteh lai in:

³⁰Huailai in a kiang ah ka om, nasemmi heutu bang in: huan niteng in a kipahna ka hi a, a ma a kipak gige in;

³¹A ten theihna lei ah; ka kipahna mite tapate kiang ah a om hi.

³²Huaiziak in tuin, ka tapate, hon ngaikhia unla: ka lampite zui mite’n nuam a sa ngal ua.

³³Hilhna za in pil unla, nial kei un.

³⁴Mi kei honza in nuam a sa hi, niteng a ka kongpi leh ka kongkhak khuamte a ngak in.

³⁵Kuapeuh honmu in hinna a mu ua, TOUPA deihsakna tang ding ahi uhi.

³⁶Himahleh kuapeuh ka tung a thil hihkhial in amah kha a hihdik kei hi: kei hon hawte’n sihna a it uhi.