Read Paite Chin EKLISIASTI 1 Bible Online

EKLISIASTI 1 - Paite Chin bible

EKLISIASTI 1

¹Thugenpa, David tapa, Jerusalem kumpipa thute.

²Bangmah loute bangmahlou, bangmah loute bangmahlou, bangteng bangmahlou ahi, Thugenpa’n a chi.

³A sepgimna tengteng ni nuai a a sepgim a kipan mihing in bang phattuamna a nei a?

⁴Khang khat a pai a, khang dang a hongtung a; tangtawn in lei a om gige.

⁵Ni leng a suakzel a, ni a tum zel; huchi in a suahna a mun lam ah a kiknawn pah hi.

⁶Simlam ah huih a pai a, mallam ah a kilehhei a; a lampi ah a kivialhei gige, huan huih a lam zuih ah a kiknawn zel hi.

⁷Luite tengteng tuipi ah a luanglut ua, himahleh tuipi a dim tuankei hi: luite paina mun lam ah, huailam ah a pai nawn uh.

⁸Thil tengteng gimna in a dim a; mihing in a gen theikei: muh in mit a lungkim kei a, zak in bil leng a lungkim sam kei.

⁹A omkhinsa a hongom ding ahi a; hihkhitsa hih a om ding ahi a; huchi in ni nuai ah thil thak a omkei hi.

¹⁰En dih, hiai a thak? chi a mite’n a gen uh thil a om hia? I ma ua hunte ua a om khinsa ahi.

¹¹Khang masate theihgigena a omkei a; a nung a hongom dingte lak ah hongom ding khang nanung lam theihgigena leng a omsam kei ding.

¹²Kei Thugenpa Jerusalem ah Israel tung ah kumpipa ka hi.

¹³Van nuai a hih a omte tengteng tungtang pilna a zong ding leh zongkhe ding a ka lungtang suah ka hi: huai a kisuk ding a mite tapate kiang a Pathian in a piak nakpitak a gimna ahi.

¹⁴Ni nuai a hih a om nasepte tengteng ka muta a; ngai in, bangteng bangmahlou ahi a, huih nungdelh ahi.

¹⁵A kawisa bawl tang theih ahi kei: huan a kimlou sim theih ahi kei.

¹⁶Keimah lungtang ka houlimpih a, Ngai in, Jerusalem a ka ma a omte tengteng sang in pilna thupi k’on muhsak a; ahi, ka lungtang in pilna a neita, chi in.

¹⁷Huchi in pilna thei ding leh, haina haitatna thei ding in ka lungtang ka suk a: hiai leng huih nungdelh ahi chih ka thei hi.

¹⁸Pil mahmahna ah lungkham mahmahna a om a: kuapeuh theihna khangsak in lungkhamna a khangsak hi.