Read Paite Chin EKLISIASTI 10 Bible Online

EKLISIASTI 10 - Paite Chin bible

EKLISIASTI 10

¹Thou sisa in gimlim bawlpa nuhtheihna uihgim a sawlkhe sak a: huchi mah bang in haina neu chik in pilna leh zahna a bukzou nak hi.

²Mi pil lungtang a khut taklam ah a om a; himahleh mihai lungtang a khut veilam ah.

³Ahi, huaiban ah, lampi a mihai a vaklai in, a theihsiamna in a zuausan a, mi chiteng kiang ah hai a hihdan a gen hi.

⁴Vaihawmmi lungsim nang dou ding a a thoh leh, na mun taisan ken; kipiak in tatkhelhna thupite a lungkimsak hi.

⁵Gilou ni nuai a ka muh, vaihawmmi a kipan a diklouhna hong kipan khia bang in a om hi.

⁶Haina nakpi a zahtakhuai in a kibawla, mun niam ah hauhsakna a tu hi.

⁷Sikhate sakol tung a tuang leh, lalte leitung a sikhate bang a khe a pai ka mu hi.

⁸Kuapeuh kawkhuk tou huai sung ah a ke ding; kuapeuh dai phuvang; gulpi in a kei ding.

⁹Kuapeuh suang hemkhia huai in a kihihna ding a; kuapeuh sing a belh huai ah lauhuai in a kibawl hi.

¹⁰Sik a mol a, min a ma a tat hiam kei leh, hatna tamsem a koih ding ahi: himahleh pilna thuzoh a phatuam hi.

¹¹Khim a om ma a gulpi in a keih leh, khimmi ah phattuamna a omta kei hi.

¹²Mi pil kam a thute hehpihthei in a om a; himahleh mihai mukte’n amah mah a nawmvalh ding.

¹³A kam a thute kipatna haina ahi: huan a houlimna tawpna lungsim kimlouhna gilou ahi.

¹⁴Mihai in leng thu a khangsak a: himahleh mihing in bang a om dia chih a theikei; huan amah nung a hongom ding, amah kuan a hilh thei dia?

¹⁵Khopi a hohna dan a theihlouh ziak in, mihaite sepgimna in amaute lak a michih a gimsak hi.

¹⁶Aw gam, na tung a gik hi, na kumpipa naupang a hihlai in na lalte’n zingsang in a ne uh!

¹⁷Aw gam, na kumpipa miliante tapa a hih a, na lalte’n, kham ding hilou a, hatna ding a a huntak a a neklai un, nuam na sa hi.

¹⁸Thadahna ziak in intung a chim a; khut zawntatna ziak in inn a keh hi.

¹⁹Nuihna ding in Ankuang a kilui a, uain in hinna a kipaksak; sum thil tengteng awnghukna ahi.

²⁰Kumpipa, na ngaihtuahna in hamsiat ken, na lupna dantan sung ah mihausate hamsiat ken: huih khua a vasate’n na aw paw ding ua, kha neite’n a thu gen ding uh a hih ziak in.