Read Paite Chin EKLISIASTI 12 Bible Online

EKLISIASTI 12 - Paite Chin bible

EKLISIASTI 12

¹Na tuailai nite in nang honsiampa theigige in, ni hoihloute a hongtun ua kumte a hongnai ua, Amaute ah kipahna ka neikei, na chih hun a hongtun nailouh lai in.

²Ni hiam, khovak leh, kha leh, aksite, hihmial a om a, meipite vuahzuk khit a a kiknawn ma un:

³inn ngakte a kivuan ua, mi hatte a hong kun ua, a tawm tak ziak ua ansute a khawl ua, tawlet a dakkhete hihmial a a om ua,

⁴Kong zing a kongkhakte khak a hih nailouh lai un; ansuk ging a ngaihlouh a, vasa aw a mi a thoh a, tumging theih tanute tengteng sukniam a a om nailouh lai un;

⁵Ahi, tung sang a om a kihta ding ua, a lampi ah launa a om ding; vaisuaklu sing a paklun ding a, huan khaukhup tunggikna ahi dia, lingmin thuk a zuau ding; mihing a inn sau a pai a, sunmite kongzing kim a a pai ziak un.

⁶Dangka khau kiphel a, dangkaeng noubem suktap a a om a, tuibel tuikhuk a hihkek a a om a, tuibem a kangtalai khe hihtan a a om nailouh lai in;

⁷Huan, a om bang in leivui lei ah a kiknawn a, kha bel a pepa Pathian kiang ah a kik hi.

⁸Bangmah loute bangmahlou, thugenmi’n a chi; bangteng bangmahlou ahi.

⁹Huaiban ah, Thugenpa a pil ziak in, mite theihna a sinsak lailai a; ahi, paunak tampi kizom zom in a ngaihtuah a, a zongkhia a, a koih hi.

¹⁰Thugenpa thu pomtakte mukhe ding in a zong a, diktak a gelhkhiak a omte, thutak thute ngei.

¹¹Mi pil thute sutna zum bang ahi a, hoihtak a khetkip sikilhnate bang tuh Belamchingpa khat thugen lakkhawm piakte ahi.

¹²Huan huailou leng, ka tapa, hilh in om in: laibu tampi bawl ahihleh tawp chih ni a omkei hi; huan zil tamna zaw sa bahna ahi.

¹³Hiai thu leh la tawpna ahi; avek in zak in a omta: Pathian laudan siam inla, a thupiakte zui in; hiai lah mihing hih ding pumpi ahi.

¹⁴Pathian in thilhih chiteng, thil selguk chiteng, a hoih hia ahihkeileh a hoihlou toh vaihawmna a la lut ding ahi.