Read Paite Chin EKLISIASTI 2 Bible Online

EKLISIASTI 2 - Paite Chin bible

EKLISIASTI 2

¹Ka lungtang in, “Kisa in, vualnopna in k’on entel dia; huaiziak in nopbawlna ah bual in” ngai in, hiai leng bangmahlou ahi, ka chi hi.

²Nuihzatna thu ah, “Haina ahi”: vualnopna thu ah, “Bang a hih a?” ka chi hi.

³A damsung ua mite tapate’n a hih ding uh bang ahia hoih ka muhtheih matan, ka lungtang in pilna kei honpi kawm in, uain a ka sa kipahsakdan leh, haina let chinten dan ka lungtang in ka zong hi.

⁴Nasepna thupi ka bawl a; innte ka kilam a;

⁵Grephuante ka kibawla; huante leh gamsitte ka kibawla, huaite ah thei chichih ka suan hi:

⁶Gammang singte khoinate hihkawt ding in, tui lite ka kibawl hi.

⁷Pasal sikhate leh numei sikhate ka lei a, ka inn sung ah sikhate a piang ua; belamhon leh bawnghon ka hau a, Jerusalem a ka ma a omte tengteng sang in:

⁸Dangka leh dangkaeng leng, bialte a kipan leh kumpipate a kipan gou lamdang ka kilakkhawm a: pasal lasamite leh numei lasamite, mite tapa kipahna, a tam a tam meite ka kineih hi.

⁹Huchi in Jerusalem a ka ma a om tengteng sang in ka thupi in, ka pung zaw a: ka pilna leng ka kiang ah a om gige hi.

¹⁰Huan, bangpeuh ka mit in a lunggulh amau ka it kei hi: nuamsakna himhim a kipan in ka lungtang ka len kei, ka sepgimnate tengteng ziak in ka lungtang lah a kipak ngal a; huan hiai tuh ka sepgimna tengteng a kipan ka tantuan ahi.

¹¹Huchi in ka khutte’n a bawl uh nasep tengteng ka vel a, semgim a ka hih nasep gimna tengteng: huan, ngai in, bangteng bangmahlou leh huih nungdelh ahi a, ni nuai ah bangmah phattuamna a omkei hi.

¹²Huan pilna leh lungsim kimlouhna leh haina en ding in ka kihei a: kumpipa nung a hongpai mihing in bang hihthei ding ahia? A kihih khinsa mahmah leng.

¹³Huchi in, khovak in khomial a khen dandan in, pilna in haina a kheng ahi chih ka muta hi.

¹⁴Mi pil mitte a lutang ah a om, mihai khomial ah a vak hi: huchi hinapi in lah thu khat mi tengteng kiang ah a tung a;

¹⁵Huailai in ka lungtang in, “Mihaite kiang a a hongom bang in, huchibang in kei kiang ah leng a hongom ding; ahihleh bangding a kei pilzaw ka hia?” ka chi hi. Huan, ka lungtang in hiai mah leng bangmahlou ahi, ka chita hi.

¹⁶Mi pil, mihai bangmah a, theihgigena lah tangtawn in a om ngal kei a: tunung chiang in avek ua mangngilh khit ahi ding uh chih thei in. Huan bangchi a mihai bang a mi pil si ahia?

¹⁷Huchi in hinna ka hua a; ni nuai a bawl thilhih kei ading a a haksat ziak in: bangteng lah bangmahlou leh huih nungdelh ahi ngal a.

¹⁸Huan, ni nuai a ka sepgim ka sepgimna tengteng ka hua a: ka nung a hongom ding mi kiang a ka nutsiat ngei ding ahi chih thei in.

¹⁹Kuan ahia mi pil hia ahihkeileh mihai a hong hih ding thei? Ka sepgimna tengteng a ka sepgimna tung ah thu a nei ding a, ni nuai a pilna ka etsakna ah. Hiai leng bangmahlou ahi.

²⁰Huaiziak in ni nuai a sepgimna tengteng ka na bawltak tungtang thu a ka lungtang lungdong sak ding in ka kipumhei hi.

²¹Mi a sepgimna pilna leh, theihna leh, kivakna toh om lah a om ngal a: himahleh huai a semgim lou mi kiang ah a tantuan ding a nutsiah in a om ding hi. Hiai leng bangmahlou leh gilou lianpi ahi.

²²Ni nuai a a sepgimna tengteng a kipan leh, a lungtang a a kisukna tengteng a kipan mihing in bang a nei a leh?

²³A nite tengteng ahi lungkhamna lel ahi ngal a, a thuakna dahna; ahi, zan nangawn in a lungtang a khawl kei hi. Hiai leng bangmahlou ahi.

²⁴Mihing ading a a nek a a dawn a, a sepgimna a thil hoih a a kha a bualsak val a hoihzaw bangmah a omkei hi. Hiai leng ka thei a, Pathian khut a kipan om ahi.

²⁵Kei sang in, kuan ahia ne thei a, ahihkeileh kuan ahia nuamsakna nei zaw?

²⁶Amah hih lungkim mi kiang ah Pathian in pilna leh, theihna leh nuamsakna a pe ngal a: himahleh mikhial kiang ah, gimthuakna a pia hi, lakhawm ding leh khawlkhawm ding in, huchi a kuapeuh Pathian hih lungkim kiang a a piak theihna ding in, Hiai leng bangmahlou leh huih nungdelh ahi.