Read Paite Chin EKLISIASTI 3 Bible Online

EKLISIASTI 3 - Paite Chin bible

EKLISIASTI 3

¹Bang chiteng a ding in hunbi a om, van nuai a thiltup chiteng a ding in hun:

²Pian hun leh sih hun; suan hun leh suansa boh khiak hun:

³Thah hun leh hihdam hun; phel hun leh lam nawn hun;

⁴Kah hun leh nuih hun; sun hun leh lam hun;

⁵Suangte paihmang hun leh suangte lak khawm hun; kawi hun leh kawi kidek hun;

⁶Zon hun leh mansuah hun; vom hun leh paihmang hun;

⁷Bohkek hun leh khui hun; pau louh hun leh thugen hun;

⁸It hun leh muhdah hun; kidou hun leh kilep hun.

⁹A sepgimna na sempan bang phattuamna a nei a?

¹⁰Huai a kisawizoina ding a Pathian in mite tapate kiang a a piak haksatna ka muta hi.

¹¹Thil chiteng a hun a kilawm in a bawl a: a lungtang uah khovel leng a koihta a, hinapi in mihing in Pathian nasep a bul a kipan a a tawppha a hihsa a mukhe theikei hi.

¹²A damsung teng un kipah leh hoih hih sang a amau adia hoihzaw bangmah a omkei chih ka thei hi.

¹³Michih in a nek a a dawn a, a sepgimna tengteng a hoih nuam a sakpih Pathian thilpiak ahi.

¹⁴Bangpeuh Pathian in a hih, tangtawn in a om ding chih ka thei a: huai ah bangmah a kikoih theikei ding a, huai a kipan in bangmah mah a ki lakhe thei sam kei ding: Pathian in a hihkhinta a, huchi in a ma ah mite’n a lau ding uhi.

¹⁵A omkhinsa pen; a om ding a omkhinsa ahi: huan Pathian in a paimangsa a zong hi.

¹⁶Huchi in ni nuai ah, vaihawmna mun ah, gitlouhna a om chih leng ka mu hi; huan diktatna mun ah, gitlouhna huai ah a om hi.

¹⁷Ka lungtang in, Pathian in midiktat leh migilou a ngaihtuah ding: thiltup chiteng leh nasep chiteng a ding in hun a om a, ka chi hi.

¹⁸Ka lungtang in, mite tapate ziak in ahi, Pathian in amau a ettel sin a, amau mahmah gamsa banglel a hihdan uh a kitheih theihna ding un.

¹⁹Mite tapate tung a tung peuhmah lah gamsate tung ah a tung ngal a; thil khat ngei a tung uah a tung a: khat a sih bang in, huchi mah bang in a dangdang a sia; ahi, hu khat a neikhawm ua: huan mihing in gamsate sang a masak zawkna a neikei: bangteng bangmahlou ahi ngal a.

²⁰Bangteng mun khat ah a pai ua; bangteng leivui a kipan ahi ua, bangteng leivui ah a kiknawn uh.

²¹Mihing kha tunglam a a pai touh leh, gamsa kha nuailam a lei a a paisuk kua ahia thei?

²²Huaiziak in mihing a nasepte a a kipah ding sang a hoihzaw bangmah a omkei chih ka thei hi; huai a tantuan ahi ngal a: amah nung in bang ahi dia chih mu ding in amah kuan honpi nawn ahia leh?