Read Paite Chin EKLISIASTI 4 Bible Online

EKLISIASTI 4 - Paite Chin bible

EKLISIASTI 4

¹Huchi in ka kihei a ni nuai a nuaisiahna hih a om tengteng ka mu a: huan ngai in, huchibang a nuaisiah a omte, lungmuanpa neiloute; huan amau nuaisiahte lam ah thilhihtheihna a om a, himahleh lungmuanpa a neikei uh.

²Huaiziak in misite a sikhinsate a damlai dam a omlaite sang in ka phat zaw:

³Ahi, a om ngei nailou, ni nuai a nasep gilou hih a om mu ngei nailou mi amau sang in ka ngaithupi zaw hi.

⁴Huchi in sepgimna leh nasep siamna tengteng, hiai ziak a mihing invengte hazat a omna ka muta hi. Hiai leng bangmahlou leh huih nungdelh ahi.

⁵Mihai in a bante khepkhawm in amah sa a ne hi.

⁶Khut dim nih sepgimna leh huih nungdelhna sang in, lungmuanna toh khut dim khat a hoihzaw hi.

⁷Huchi in ka kihei a ni nuai a bangmahlou ka mu hi.

⁸Amah kia a om khat ka mu a, nihna a neikei a; ahi, tapa a neikei, sanggampa leng a neikei; hinapi in lah a sepgim tawpna a omkei a, hauhsakna in a mitte leng a lungkim tuankei hi. “Kua adia semgim a, ka kha hoih tansak ka hia?” a chi a. Hiai leng bangmahlou ahi, ahi, nakpi a gimthuakna ahi.

⁹Khat sang in nih a hoihzaw; a sepgimna ua ding a kipahman hoih a neih ziak un.

¹⁰Puk le uh, khat in a lawm phong ding a hih ziak in: himahleh a puk chiang a amah kia a om a, amah phong ding midang neilou tung a gik hi.

¹¹Huailou in, nih a lupkhawm un, lumna a thei uh: himahleh khat kia bangchi’n a lum thei dia?

¹²Huan, mi khat in amah kia a om pen zou leh, nih in amah a dou ding ua; khau zang guk a hek a kitat mengmeng kei hi.

¹³Kumpipa tek leh hai, thuhilhna sangthei nawnlou sang in tuailai genthei leh pil a hoihzaw hi.

¹⁴Suangkulh a kipan a kumpipa hi ding a hong paikhia lah a hingal a; ahi, amah gam mahmah a genthei sa a piang ahi.

¹⁵Ni nuai a vak a hing tengteng, tuailaite toh a om uh ahihleh, a nihna, a mun ah ading chih ka muta hi.

¹⁶Mi tengteng, a amaute tung a a omna mahmah, bei chih a omkei a: hinapi in lah tunung chia hongom dingte amah ah a kipak kei ding uh. Chihtaktak in hiai leng bangmahlou leh huih nungdelh ahi.