Read Paite Chin EKLISIASTI 5 Bible Online

EKLISIASTI 5 - Paite Chin bible

EKLISIASTI 5

¹Pathian inn a na hoh chiang in na khepek kem in; ngaikhe ding a pai mihaite kithoihna piak sang in a hoihzaw ngal a: gilou a hih uh chih a kithei kei uhi.

²Kamlawp kenla, Pathian ma a thil himhim gen ding in na lungtang lawptawp kei hen; Pathian lah van ah a om a, nang lah leitung ah na om ngal a: huaiziak in na thute tawmsak in.

³Mang lah thu leh la tampi toh a hongom a; huan mihai aw thu tampi toh.

⁴Pathian kiang a thuchiam na chiam chiang in, peding in hal ken; mihaite tung ah kipahna a nei ngal kei a: na thuchiam pen pia in.

⁵Na chiam a na piaklouh sang in, na chiamlouh a hoihzaw hi.

⁶Na kam in na sa thil a hihkhelh sak phal ken: angel ma ah leng, a dik kei chi sam ken: bangding in na aw ah Pathian in a heh in, na khut nasep a hihse dia?

⁷Huchibang in mangte tamna ah bangmah loute a tam thu tampite ziak in siatna hongom ngal nak a: himahleh nang zaw Pathian kihta in.

⁸Gentheite nuaisiahna leh, hiamgamna in bialsung ah vaihawmna leh diktatna a lamang chih na muh leh, huai thu lamdang sa ken: thuneitu sangte’n thuneihna neite a enkai ua; huan amau tung ah a sangzaw a om hi.

⁹Huailou in lei a punna bangteng ading ahi: kumpipa ngei leng louma in a na a sepsak hi.

¹⁰Kuapeuh dangka deihta dangka in a lungkim kei ding; kuapeuh hauhsakna punna deihta leng: hiai leng bangmahlou ahi.

¹¹Van a kibehlap chiang in, amau nete a khang uh; huan huai neimi ading in bang phattuamna a om a, a mitte a huaite et chih ngallouh?

¹²Ne tawm in ne tam leh, semgim mi ihmut a lim a; himahleh mihausa vahna in amah a ihmu sak kei hi.

¹³Ni nuai a gilou hoih hetlou ka muh a om a, huai tuh, hauhsakna a neipa’n amah siatna dia a kep:

¹⁴Himahleh huai hauhsaknate thuakna gilou in a mangthang hi; tapa a suan leh, a khut ah bangmah a omkei.

¹⁵A nu gil a kipan a hongpai leh, vuaktang in a painawn ding a hongpai bang in, a sepgimna, a khut a a puak mang theih, ading in bangmah a lakei ding hi.

¹⁶Huan hiai leng gilou hoih hetlou ahi, a hongpai dan tengteng in, hichibang in a pai ding a: huih ading a a sepgimna ah bang punna a nei a?

¹⁷A damsung teng in khomial ah an a ne a, huan nakpitak a hihbuai in a om a, chinatna leh thangpaihna a nei hi.

¹⁸Ngai in, hoih leh kilawm hi a ka muh min Pathian in amah a piak a damsung teng a a nek a, a dawn a, ni nuai a a sepgimna a sepgimna tengteng a hoih nuam a sakpiha, huai ahi: hiai lah a tantuan ahi ngal a.

¹⁹Mi chiteng leng amah kiang a Pathian in hauhsakna leh neihzohna a piak, huai a nek theihna a piak a, a tantuan la ding leh a sepgimna a kipak ding in; hiai Pathian thilpiak ahi.

²⁰A damlai nite lah a theigige kei ding a; a lungtang kipahna a Pathian in amah a dawn ziak in.