Read Paite Chin EKLISIASTI 7 Bible Online

EKLISIASTI 7 - Paite Chin bible

EKLISIASTI 7

¹Nuhtheih mantam sang in min hoih a hoihzaw; mi pianni sang in sihni.

²Ankuangluina inn a hoh sang in, sunna inn a hoh a hoihzaw: huai mi tengteng tawpna ahi a; huan mihing in a lungtang a a ngaihtuah ding ahi.

³Nuih sang in lungkham a hoihzaw: mel lungkhamna ah lungtang kipahsak in lah a om ngal a.

⁴Mi pil lungtang sunna inn ah a om; himahleh mihaite lungtang vualnopna inn ah a om hi.

⁵Mi ading in mihaite lasak zak sang in, mi pil taina zak a hoih zaw.

⁶Bel nuai a lingte puak vengvung bang in, mihai nuihna huchibang in a om ngal a: hiai leng bangmahlou ahi.

⁷Simmohna in mi pil a haisak mahmah a; thilpiak in theihsiamna a susia hi.

⁸A kipatna sang in thil tawpna a hoihzaw: lungsim a kisaktheih sang in lungsim a dohtheih a hoihzaw hi.

⁹Heh ding in na lungsim in man gang ken; hehna lah mihaite awm ah a khawl hi.

¹⁰Nidanglaite hiaite sang a a hoihzawkna a ziak bang ahia? chi ken; hiai thu lah pilhuaitakin na dong kei hi.

¹¹Pilna gouluah bang in a hoih a; ahi, amau ni mute ading in a hoihzaw tham hi.

¹²Dangka sum kihumna ahi bang in, pilna lah kihumna ahi ngal a: himahleh theihna hoihzawkna bel, pilna in a neimi hinna a hawi sak hi.

¹³Pathian nasep ngaihtuah in: aman a kawisak sa, kua ahia bawl tang thei ding leh?

¹⁴Hauhsak ni’n nuamsa inla, huan vangtahni in ngaihtuah in: mihing in a nung a thil om ding a muhkhiak louhna ding in, Pathian in khat lah a dang kiang ah kihiang helhel in a bawl hi.

¹⁵Ka bangmahlou ni’n hiai tengteng ka muta hi: mi diktat a diktatna a mangthang a om a, huan migilou a gilou bawlna a a hinna hihsau a om hi.

¹⁶Ki diktatsak lawzen ken; kipilsak lawzen sam ken: bangdia nang kihihse ding na hia?

¹⁷Gilou lawzen kenla, hai sam ken: na hun tun ma a bangdia si ding na hia?

¹⁸Hiai na let chinten a hoih hi; ahi huai a kipan in leng na khut kai ken: kuapeuh Pathian kihta lah a mute tengteng a kipan hong paikhe ding uh ahi ngal a.

¹⁹Khopi a om vaihawmmi sawm sang in mi pil ading in pilna a thupizaw.

²⁰Hoih hih a, khiallou, leitung ah mi diktatna a om mahmah kei hi.

²¹Thu kigen tengteng leng limsak khol dah in; huchilou in zaw na sikha in nang a hon hamsiat naza kha ding hi:

²²Na lungtang in lah huchi mah bang in nang leng midangte na hamsiat munchih a thei ngal a.

²³Hiai tengteng pilna in ka enchian vek a: Ka pil ding ka chi a; himahleh kei a kipan a gamla hi.

²⁴Gamla tak a thilte leh a thuk petpet a; kuan a mu khe thei dia?

²⁵Ka kipumhei a, thei ding leh zongkhe ding, pilna zong ding leh, thilte ziak zong ding, gitlouhna haina ahi chih thei ding, haina lungsim kimlouhna ahi chih thei ding in ka lungtang koih kip in a om hi:

²⁶Sihna sang a khazaw tuh numei, a lungtang thangte leh lente hi a, a khut henna khau hi ahi chih ka muta hi.

²⁷Ngai in, hiai ka mu khia, thugentu in a chi: thil a omdan tak mukhe ding in thil a khat a khat ka buk hi,

²⁸Tuin leng ka zonglai a ka mu kei: pasal sang khat lak a mitang khat ka mu, himahleh numei tengteng lak ah mitang ka mu kei hi.

²⁹Ngai in, Pathian in mihing hoihtak in a bawl chih, hiai kia ka mu a; himahleh bawltawm tampi a zongkhia uhi.