Read Paite Chin EKLISIASTI 8 Bible Online

EKLISIASTI 8 - Paite Chin bible

EKLISIASTI 8

¹Mi pil bang a om kua ahia? Huan thil hilhchetna kua ahia thei? Mihing pilna in a mai a vaksak a, a mai takna a kikheng hi.

²K’on thuhilh, Pathian thuchiam lam thu ah, kumpipa thupiak zui in.

³A omna mun a kipan paikhe ding in man gang ken; thil gilou ah engtat ken: aman lah a utut a hihsek ngal a.

⁴Kumpipa thu in thilhihtheihna a neih ziak in; “Bang ahia na hih?” Kuan ahia a kiang a chi thei ding?

⁵Thupiak zuite’n thil gilou a theikei ding uh; huan mi pil lungtang in hun leh vaihawmna a theikhen zel:

⁶Thiltup chiteng ah lah hun leh vaihawmna a om ngal a; mihing haksatna lah a tung ah a thupi ngal a:

⁷A hongom ding lah a thei ngal kei a; bangchi in a om dia chih amah kuan a hilh thei dia leh?

⁸Kha lentang ding in kha tung a thilhihtheihna neimi a omkei; sihna ni tung ah leng thilhihtheihna a neisam kei: Huan huai kidouna ah panna a omkei: piak a om gitlouhna in amah a hunkhe sam kei ding hi.

⁹Hiai tengteng ka mu a, nasep chiteng ni nuai a hih ah ka lungtang ka pia a: a siatna ding in mi khat in midang tung a thil hihtheihna a neih louh hun a om hi.

¹⁰Huan giloute vui a om ka mulai a, huan han ah a hong ua; huchi in hihdikte Mun Siangthou a kipan a paimang ua, khopi ah mangngilh in a om uhi: hiai leng bangmahlou ahi.

¹¹Gilou nasep kintak a gawtna a kibawl louh ziak in, huaiziak in mite tapate lungtang gilou hih ding in huai ah koih kip in a om hi.

¹²Mikhial in gilou za vei hih in, a nite susau mahleh, Pathian kihtamite amau ading in a hoih ding chih ka thei mahmah hi, a ma a laudan siamte:

¹³Himahleh giloute ading in a hoih kei ding, a nite leng a sausak kei ding a, huai lah limliap bang ahi; Pathian ma a laudan a siamlouh ziak in.

¹⁴Bangmahlou leitung a hih a om a om a; mi diktat omta bang hileh leng, amah tung a migilou nasep dungzui in a hongom nak hi; huailou in migiloute omta bang hileh leng, mi diktatte nasep dungzui in a tung uah a hongom hi: hiai leng bangmahlou ahi.

¹⁵Nek leh dawn a vualnuam a om kan a ni nuai a mihing in thil hoihzaw a neih louh ziak in, vualnopna ka phat hi: Pathian in amah ni nuai a a piak a damsung ni tengteng a a sepgimna ah amah toh a om gige ding ahi ngal a.

¹⁶Pilna thei ding leh, leitung a hih a om thulehla mu ding a ka lungtang ka suklai in: sun hiam zan hiam a mit a ihmut muhlouh lah a om ngal a:

¹⁷Huchi in Pathian thilhih tengteng ka mu a, huchi in ni nuai a thilhih mihing in a mukhe theikei hi: zong khe ding in mihing nakpitak in pang lezong, a muhlouh ding ziak in; huailou in, mi pil in thei kisa mahleh, a mukhe theikei ding hi.