Read Paite Chin EKLISIASTI 9 Bible Online

EKLISIASTI 9 - Paite Chin bible

EKLISIASTI 9

¹Hiai tengteng ka lungtang in ka vei ngal a, hiai tengteng zongkhe ding in; midiktatte, leh mipilte leh a thilhihte uh Pathian khut ah a om ahi chih: itna ahi hia, muhdahna, mihing in a theikei; a ma uah avek in a om hi.

²Thil tengteng kibang in avek ua kiang ah a hongom a: mi diktatte leh migiloute tung ah tanchin khat a om hi; mi hoih kiang a leh mi siang kiang a leh mi sianglou kiang ah; kithoih mi kiang leh kithoihlou mi kiang ah: mi hoih a om bang in, mikhial a om a; a kichiampa, thuchiam kihtapa bang in.

³Ni nuai ah hih a om tengteng ah hiai gilou ahi, bangteng tung a tanchin khat om: ahi nalai a, mite tapate lungtang gilou in a dim a, a damlai uh a lungtang uah lungsim kimlouhna a om, huai nung in misite kiang ah a pai uh.

⁴Amah hing lai tengteng toh kizom a om ding in lah lametna a om ngal a: humpinelkai sisa sang in ui hinglai lah a hoihzaw ngal a.

⁵Mihingte’n a si ding uh chih lah a thei ngal ua: himahleh misi in thil himhim a theikei, kipahman leng a neita kei uhi; amaute theihgigena lah a kimangngilh hi.

⁶A itna uh bang in, a muhdahna uleh a enna uh tuin a mangta a; ni nuai a hih a om thil himhim ah tangtawn in tantuan a nei nawnta kei uhi.

⁷Pai inla, nuamsakna toh na tanghou ne inla, lungtang kipak toh in na uain dawn in: Pathian in lah na thilhihte a sangkhinta ngal a.

⁸Na puansilhte ngou gige in om hen; huan na lu in nilhtheih tasam kei hen.

⁹Na bangmahlou damsung ni tengteng a na it zi kiang ah kipaktak in om inla, huai aman ni nuai a a honpiak, na bangmahlou ni tengteng in: huai lah damsung in na tantuan ahi ngal a, ni nuai a na sepgimna a na sepgimna ah.

¹⁰Na khut in hih ding bangpeuh a muh na theihtawp in sem in; na paina lam han sung ah, nasep hiam, thilngaihtuah hiam, theihna hiam, pilna hiam a omlou ding ahi ngal a.

¹¹Ka kihei a, kitaitehna kinte ading ahi kei a, galdouna hatte ading ahi tuankei chih ka mu hi, tanghou leng pilte ading, hauhsakna leng theisiam mite ading, deihsakna khutsiamte ading hi tuanlou; himahleh hun leh phat amaute tengteng tung ah a hongom zel hi.

¹²Mihing in a hun a thei kei hi: ngasate len gilou a a kiman bang leh, vasate thang a a awk uh bang in, huchibang in mite tapate, amau tung a thakhat a a hong tunguih lai in, hun gilou a mat in a om uhi.

¹³Hichibang in pilna leng ni nuai ah ka mu a, ka kiang ah thupi in a kilang hi.

¹⁴Khopi lianlou a om a, asung ah mi tawmchik; huan kumpipa thupi in a hong sim a, a la a, a douna ding in sepaih nasep thupitak a bawl hi.

¹⁵Huchi in huai ah mi pil genthei khat a om, a pilna in khopi a hunkhia a; himahleh kuamah in huai migentheipa a theigige kei uh.

¹⁶Huan, ken, “Hatna sang in pilna a hoihzaw; mi genthei pilna muhsit in a om a, a thute ngaihkhiak sak in a omkei ” ka chi.

¹⁷Mihaite lak a vaihawmmi kikou sang in awl a mi pil thugente a kiza zaw hi.

¹⁸Kidouna galvante sang in pilna a hoihzaw; himahleh mikhial khat in hoih tampi a hihsia hi.