Read Paite Chin SOLOMON LATE 1 Bible Online

SOLOMON LATE 1 - Paite Chin bible

SOLOMON LATE 1

¹Late la, Solomon a.

²Na kam tawpnate in hontawp lechin aw! na itna uain sang in a hoihzaw ngal a.

³Na kinuhte’n gimlim hoihtak a nei a, na min kinuh butkhiak bang ahi a, huaiziak in nungak siangthoute’n nang a hon it uhi.

⁴Honkai in, nang k’on delh ding: kumpipa’n a dantante sung ah a honpita a, nang ah ka kipak un nuam ka sa ding uh, uain sang in na itna ka genkhe mun za ding ua: A dikte’n nang a hon it uh.

⁵Ka vom a, himahleh ka mel a hoih hi, Aw nou Jerusalem tanute, Kedar puaninte bang, Solomon puankhaite bang.

⁶Ka vom ziak in hon en ken, ni’n a honhai ziak in. Ka nu tapate ka tung ah a thangpai ua, grephuante kem in a honbawl ua; himahleh keimah grephuan leng ka kem kei.

⁷Honhilh ve, aw nang ka kha in a it, na ganhon vakna mun, sunlai a na khawlsakna mun: bangding a na kithuahpihte lak a ganhon kiang a maituam bang a kei om ding ka hia?

⁸Na theih kei leh, Aw nang numeite lak a kilawmpen, ganhonte khapte zui in kuan khia inla, belamchingte puanin kiang ah na kelnoute vak in.

⁹Aw ka it, Pharo kangtalaite lak a sakol toh k’on teh hi.

¹⁰Na biang samphekte toh a kilawm a, na ngawng suangmantam khite toh.

¹¹Dangkaeng samphekte dangka siatte toh k’on bawlsak ding uh.

¹²Kumpipa a dohkan a a tutlai in, ka spiknardi gimlim in a namtuina a sawlkhia.

¹³Ka ngaihnou kei ading in murra gimlim bang ahi a, ka nawite kikal a om.

¹⁴Ka ngaihnou kei ading in Engedi grephuante a henna pak bawk bang ahi.

¹⁵Ngai in, na kilawm, ka it; ngai in, na kilawm; na mitte vahui bang ahi uh.

¹⁶Ngai in, na kilawm ka ngaihnou, ahi, a nuam: i tutna nem leng a hing.

¹⁷Sidar singte i inkamte ahi a, i insunte meilah singte ahi.