Read Paite Chin SOLOMON LATE 2 Bible Online

SOLOMON LATE 2 - Paite Chin bible

SOLOMON LATE 2

¹Saron pak ka hi, phaizang lili pak.

²Ling lak a lili pak bang in, huchibang in tanute lak ah ka it a om hi.

³Gamlak singte lak a apple kung bang in, huchibang in tapate lak ah ka ngaihnou a om hi. Nakpi a kipahna toh a lim nuai ah ka tu a, a gah ka chep in a khum hi.

⁴Ankuangluina inn ah a honpi a, ka tung a kizak puanlap a itna ahi.

⁵Grep phoukeu in honkhou unla, apple theiin honnem un: zawlngai in ka chi a na ngal a.

⁶A khut veilam ka lu nuai ah a om a, a khut taklam in a honkawi hi.

⁷Zuktal leh gam a zukpite k’on ngen hi, Aw Jerusalem tanute, ka it hihbuai kei unla, phawng kei un, a lungkim matan.

⁸Ka ngaihnou aw! ngai un, a hong hi, mualte tung ah a tawm a, tang tungte ah a diang hi.

⁹Ka ngaihnou zaw zuktal hiam sakhi tuailai bang ahi: Ngai in, ka kulhbang nunglam uah ading a, tohlette ah a en a, a nannate ah amah a kimu sak.

¹⁰Ka ngaihnou in thu a gen a, ka kiang ah Pasal thou in, ka it, ka kilawmnou, hongpai meng in, a chi hi.

¹¹Ngai in, phalbi lah a beita ngal a, vuah a theuta a, a paimangta hi;

¹²Leitung ah pakte hong kilang a; vasate lasak hun a hongtung a, i gam uah vakhu aw a kizata hi;

¹³Theipi kung in gahhingte a minsak a, grepguite a paklun uhi, a gimlimte uh a suaksak uhi. Thouve, ka it, ka kilawmnou hongpai meng in.

¹⁴Mun sang a suangpi heng a om, vakhu bang na hi, na mel hon musak inla, na aw hon zasak in, na aw a khum a, na mel a hoih hi.

¹⁵Sehalte, grephuan hihsia, sehal neute honmat sak ve; ka grephuan uh a paklun ngal a.

¹⁶Ka ngaihnou kei a ahi, kei amah a ka hi: lili pak lak ah a gan a ching a,

¹⁷Ni a hongnem a, limliapte a man matan, ka ngaihnou, kihei inla, Bether mualtung a zuktal hiam sakhi tuailai bang in om in.