Read Paite Chin SOLOMON LATE 4 Bible Online

SOLOMON LATE 4 - Paite Chin bible

SOLOMON LATE 4

¹Ngai in, na kilawm hi, ka it; ngai in, na kilawm hi; na maituamna liah ah na mitte vahui bang ahi ua: na sam kelhon bang ahi, Gilead mualpang a kualte.

²Na hate mulmet thak belamnu hon bang ahi ua, sil khitphet a hongpai toute; huai ah amaute chiat in phik a nei ua, a lak ua kuamah a ching a omkei uh.

³Na mukte khau san-au a bang ua, na kam a kilawm a: na mit laivomte theibuhfai them bang ahi na maituamna liah ah.

⁴Na ngawng David galvan koihna insang a lam bang ahi, lumbem neute sang khat kikhaina mun, mi hat lum in a kivan uh.

⁵Na nawite zuktal nou nih phikte a bang ua, lili pak lak a tate.

⁶Ni a nem a limliap a man mateng murra mual ah leh, begaw tang ah ka hoh ding.

⁷Na kilawm hi, ka it; nang ah thil nin bangmah a omkei hi.

⁸Lebanon a kipan honzui in, Ka mou, Lebanon apan kei toh: Amana vum a kipan dak in, Shenir leh Hermon vum a kipan, humpinelkaite kua a kipan, gialbemte mual a kipan.

⁹Ka lungtang na tuahmangta, ka sanggamnu, ka mou; na mitte lak a khat in ka lungtang na tuahmangta hi, na ngawng a khainiang khat in.

¹⁰Na itna kilawm natel e, ka sanggamnu, ka mou! Na itna uain sang in nakpi’n a hoihzaw! Na kinuh gim, gimlim chiteng sang in a hoihzaw.

¹¹Na mukte, Aw ka mou, khuaikhak bang in a takkhia a: na lei nuai ah khuaizu leh nawitui a om; na puansilh gim Lebanon gim ahi.

¹²Huan umsuak ka sanggamnu, ka mou; tuinak kihu, tui kivuh.

¹³Na huansung theibuhfai, gah manphate toh ahi; spiknardi singsuan toh henna pak ahi.

¹⁴Spiknardi leh pak gimlim, kepbuk leh singnamtui begaw sing tengteng; murra leh aloe, gimlim pipen teng toh.

¹⁵Huan a tuikhuk na hi a, tuihing lui, Lebanon a kipan a lui luangte.

¹⁶Khanglou in, Aw mallam huih; huan hong in, nang simlam; ka huan tung ah hongnung in, Na gimnamtuite a luankhiak theihna ding in. Ka ngaihnou a huansung ah hongpai henla, a theigah manphate ne hen aw.