Read Paite Chin SOLOMON LATE 5 Bible Online

SOLOMON LATE 5 - Paite Chin bible

SOLOMON LATE 5

¹Ka huan sung ah ka hongpai hi, ka sanggamnu, ka mou: ka murra ka gimnamtui toh ka lakhawmta: ka khuaikhak ka khuaizu toh ka neta a; ka uain ka nawitui toh ka dawnta. Numeite Aw, lawmte, Ne un; dawn un, ahi, tampi dawn un, Aw ka ngaihnou.

²Ka ihmu a, himahleh ka lungtang a hak: a kiu ka ngaihnou aw ahi, Honhon in, ka sanggamnu, ka it, ka vahui, ka nin banglou: ka lutang daitui in a dim a, ka samtum lah zan a tuitakin.

³Ka puanak tung ka suahta a: bangchi’n ka silh nawn dia? Ka khepekte ka silta a; bangchi’n ka hihnin dia?

⁴Ka ngaihnou in kongkhak awng ah a khut a hon golhlut a, amah ziak in ka lungtang hihlin in a om hi.

⁵Ka ngaihnou hon ding in ka thou ta a; Ka khutte murra in a tak a, ka khutzungte murra tui in, kalhna hekna tung ah.

⁶Ka ngaihnou ka honta a; himahleh ka ngaihnou a na kiknawn a a na omta kei hi. Thu a genlai in ka kha in a hon zuausan a: amah ka zong a, himahleh hon dawng kei hi.

⁷Khopi a vialvak vengmite’n a honmu ua, a honkhen ua, a hon liamsak uh; kulhbang ngakte’n ka puanak a honlak mangsak uh.

⁸K’on ngen ahi, Aw Jerusalem tanute, Ka ngaihnou na muh uleh, zawlngai in ka chi a na chih, amah na hilh un.

⁹Na ngaihnou, ngaihnou dang sang a a tuansemna bang ahia? Aw nang numeite lak a kilawmpen? Na ngaihnou, ngaihnou dang sang a a tuansemna bang ahia, huchibang n’on nget?

¹⁰Ka ngaihnou zaw a san hiuhiau a, sang sawm lak a pipen ahi.

¹¹A lutang dangkaeng hoihpen a bang a, a samtumte a lian a, va-ak bang in a vom hi.

¹²A mitte luita tui kiang a vahui bang ahi a; nawitui a sil, kituaktak a bulh ahi.

¹³A biangte gimnamtui omna bang ahi a, loupa gimlim bang: a mukte lili pak bang ahia, murra tui takkhesak in.

¹⁴A khutte dangkaeng zungbuh beril suangmantam siatna bang ahi: a pumpi saiha a bawl sapphir suangmantam a luan bang ahi.

¹⁵A khete suangpak khuam, dangkaeng hoihte kuak a kitung bang ahi: A kilatdan Lebanon bang, sidar bang a thupi ahi.

¹⁶A kam a khum penpen a: ahi, a ngaihhuai tuntun hi. Hiai ka ngaihnou ahi a, hiai ka lawm ahi. Aw Jerusalem tanute.