Read Paite Chin ISAI 1 Bible Online

ISAI 1 - Paite Chin bible

ISAI 1

¹Amoz tapa Isai in Judah kumpipa Uzziah, Jotham, Ahaz leh Hezekiah te vaihawm lai a, Judah leh Jerusalem tungtang thu a kilakna a muh thu:

²“Vante aw, ngaikhia unla, lei aw, bildoh in, TOUPA’N thu a gen hi: Tapate ka khoi a, ka khanglian sak a, ka tung ah lah a hel ngal ua.

³Bawngtal in a neitu a thei a, sabiltung in leng a pu anpiakna a thei: Israelte’n bel a theikei uh, ka mite’n a ngaihtuah kei uh” chi in.

⁴Ah! nam gilou thulimlouhna gikpi pua mite, thil hoihlou hihte, gamtat hoihlou pi a gamtate ahi ua: TOUPA a paisan ua, Israelte Mi Siangthou a musit ua, kihihtuam in a nungtolhta uh.

⁵Bang achia hel semsem a, vuak a om lailai na hi ua oi? Lutang a pum in a chi a na a, lungtang leng a pum in a gimta.

⁶Khepeknuai a kipan a lutang pha in damlai himhim a omkei; chikeh, vuak sidup ek, meima naila ngen ahi: huaite lah a mekbing kei ua, tuam leng a tuam sam kei ua, sathau leng a nuh kei uhi.

⁷Na gam uh loihin a omkhinta; na khuate uh mei in a kangkhinta: na gam uh gamdang mite’n na mitmuh un a neikhin ua, gamdang mite hihsiat bang in a sekhinta hi.

⁸Zion tanu grephuan a vennabuk bang leh, tangmai huan a buk bang leh, khopi umsuak bang a nutsiat in a omta hi.

⁹Sepaihte TOUPA’N hih manthat bang tawmchik hon na sitsaklou hileh Sodom bang in i omkhin ding ua, Gomorrah bang in i omkhinta ding uhi.

¹⁰Sodom vaihawmte aw, TOUPA thu za un; Gomorrah mite aw, i Pathian danthu ah bildoh un.

¹¹TOUPA’N, “Huai zahzah a na kithoihna uh kei ding a bang ahia a thamatna om? Belamtal haltum a latte leh gan vakthaute thau in a honnimta; bawngpate leh belamnoute leh kelpate sisan ah leng ka kipak kei, a chi.

¹²Ka ma a kilak ding a na hongpai un, ka biakin huangsung intual sik ding kuan a honphut a?

¹³Thilpiak bangmah loute hontawi nawn kei un; banghiam gimlim kei ading in thil kihhuaipi ahi; kha thakte, khawlnite, khawmpite na kichial khawmte mawkmawk uh ka iplah mahmah; kikhopna thupitak leng thulimlouhna ahi.

¹⁴Na kha thakte uleh hunbi nei a na ankuangluinate uh ka lungsim in a hua hi: kei adin tunggikna ahi; ka thuak chimta hi.

¹⁵“Huchi in na khut uh na zak chiang un leng ka mit k’on humsan dia: ahi, tamveipi na thum chiang un leng ka ngaikhe kei ding: na khutte ulah sisan in a dim ngal a.

¹⁶Kisil unla, kihihsiang un; ka mitmuh phaklouh din na thilhihte uh a gitlouhna koihmang un; gilou hih tawpta un:

¹⁷Thil hoih hih kisinta unla; vaihawmna diktat zong un, nuaisiahna thuakte panpih unla, pa neiloute vai hawmsak unla, meithai thu gensak un” a chi hi.

¹⁸TOUPA’N, “Hongpai un, ngaihtuah khawm dih veni! Na khelhnate uh sanau bang in om mahleh, vuk bang in a ngou ding; sandup bang in san khin mahleh belam mul bang in a om ding.

¹⁹Gennop tak leh thumang a na om uleh, na gam thil hoihte uh na ne ding uh:

²⁰Himahleh na ut kei ua na hel uleh, namsau nekkhit in na om ding uh: TOUPA kam in huai a genta hi” a chi hi.

²¹Bangchidan ahia khopi muanhuaitak kizuak a hongsuah maimah, vaihawm diktatna a dim nu hisek hi a! Amah ah diktatna a omsek a, tun lah tualthatmite om hi!

²²Na dangka eksia a hong hita, na uain lah tui toh hel ahita.

²³Na mi liante mihelhat, gutate lawmte ahi uh; michih in golhna a deih ua, thilpiak a delhnak uhi: pa neiloute a hawmsak sek kei ua, meithaite makhua khualna leng a kiang uh a tung ngei sam kei hi.

²⁴Huaiziak in, TOUPA, Sepaihte TOUPA, Israelte Mihat in hichi in a chi! “Awle! hondoute tung ah ka hehna ka tangtung sak dia, ka melmate tung ah phu ka la ding:

²⁵Huchi in, na tung ah ka khut ka kha ding a, na eksia siang sipsip in ka hihmang ding, na sikgawm tengteng ka lamang vek ding:

²⁶Huan, na sung a vaihawmtute a tung a a om bang un ka omsak nawn ding a, na sung a lemtheimite a masapen a a om bang un ka omsak lai ding hi: Huai khitchiang in, Diktatna khopi, khopi muanhuai, a honchi ding uhi” a chi hi.

²⁷Zion vaihawmna diktata hotkhiak ahita ding a, asung a mi piangthak nawnte leng diktatna a hotkhiak ahi ding uhi.

²⁸Himahleh mihelte leh mikhialte hihsiatna a kituakin a om ding a, TOUPA paisan mite leng hihman in a om ding uhi.

²⁹Na tosaw deihmah mahte uh a zumpihta ding ua, na huan telte uh ziak in zaktatakin na om ding uhi.

³⁰Tosaw a nah vuaite leh huan tui mulou bang phet na hi ding hi.

³¹Huchi in, mi hattak jija zial bang ahita ding a, a nasep meiek bang ahi ding; huchi in a kang tuaktuak ding ua; kuamah in a phelh kei ding uh, chi in.