Read Paite Chin ISAI 10 Bible Online

ISAI 10 - Paite Chin bible

ISAI 10

¹Hoihlou tak a thupukna bawlte leh diklou tak a gelhmite tung a gik hi!

²Meithaite tanding gallak a laksak a om theihna ding uleh, pa neiloute thil laksak bang a a bawl theihna ding un, neizouloute vaihawmna diktat tangsaklou ding leh, ka mite lak a gentheite muh ding mawngmawng laksak tumte!

³Huchi in, gawtna ni a hongtun chiang leh gamlapi a kipan huihpi a hongtun chiang in, bang na hih ding ua oi? Panpihna ngen ding in kua kiang ah na taita ding ua? Na thupina uh koi ah na nuseta ding ua?

⁴Hentate lak ah a kun ding ua, thahte lak ah a puk ding uh, hiaite lel a tan uh ahita ding hi. Huchi a hih in leng, a hehna lah a dai kei a, a khut a lik lailai hi.

⁵TOUPA’N "Kisa in, Assuria mi, ka hehna khetbuk, ka lungkimlouhna chiang tawi!

⁶Gallak la ding leh, thil laksak la ding leh, kongzing buannawi bang a ngap ding in amah zaw Pathian zahlou nam dou ding in ka sawl ding a, ka hehna mite sual ding in thu ka pe ding hi” a chi hi.

⁷Himahleh aman huchibang a tup ahi kei a, huchibang zaw a lungsim in leng a ngaihtuah sam kei; nam tam petmah a tam hihsiat leh hih manthat ahi, lungsim a a neih zawk.

⁸“Ka miliante tengteng kumpipa ahivek kei ua hia?

⁹Kalno khua Karkhemish khua bang hitalou ahi maw? Hamath khua Arpad khua bang hita lou ahi maw? Samaria khua Damaska khua bang hita lou ahi maw?

¹⁰Ka khut in milimte gam, Jerusalem khua leh Samaria khuate sang a milim bawltawm hoihzaw neite leng, a zongkheta uhi.

¹¹Samaria leh a milimte tung a ka hihtak bang in Jerusalem leh a milimte tung ah ka hih kei dia hia?”

¹²Huchi a hih ziak in hichi ahi ding a; “TOUPA’N Zion tang leh Jerusalem khaw sung a a nasep ding tengteng a sepkhit hun chiang in Assuria kumpipa lungsim kiotsakna gah leh a mit kisathei thupina ka gawt ding” a chi hi.

¹³Aman, “Ka khut hatna in ka hihta hi, ka pilna toh in; ka kizen ngal a; chichih gamgite lah ka suan a, a vaihawmna uh lah ka suta, mangtutphah a tute mi hangsan hih bang in ka kaikhia hi.

¹⁴Ka khut in chichih hauhsaknate lah vasabu bang in a zongkhia a; min vasa tui a pi loihsansa a la uh bang in lei tengteng ka la khinvekta hi; khazap hiam, kamka hiam ham himhim leng a omkei uhi," a chi vial ngal a.

¹⁵Heipi in thil ehna ding a a zangmi a kisaktheihsan dia hia? Singatna in a atmi a nuaisiah dia hia? Khetbuk in a dommite a lik zawsop diam aw, chiang in sing hilou a lik zawmah bang phet ahi.

¹⁶Huaiziak in TOUPA, Sepaihte TOUPA’N, “A mi thaute lak ah gawnna a sawl ding a; a thupina nuai ah mei kuang lai lel bang in mei toh in a om ding.

¹⁷Huan, Israelte vakna mei a honghi ding a, a Misiangthou mah uleng meikuang ahi ding; huai in ni khat thu in loulingneite leh khaulingneite a kangsak in a hih mangthang ding.

¹⁸A gammang leh a lei hoih mun thupina leng, kha leh sa nasan in, a hihmang ding; huchi in, chiamtehna tawipen kia hunlai bang ahi ding.

¹⁹A gammang a sing omzek laite naupang gelh tham phet a tawm ahita ding” a chi hi.

²⁰Huai ni’n hichi ahi ding a, Israelte omlaite leh Jakob inkuanpihte lak a a damlaite’n amaute thatpa a muang nawnta kei ding ua; TOUPA Israelte Mi Siangthou, chihtaktak in a muangzawta ding uhi.

²¹A omlai, Jakob omlaite, Pathian hattak kiang ah a kiknawn ding uh.

²²Na mi Israelte tuipi piaunel zah in om mahle uh, a omlaite kia a kiknawn ding uhi; diktatna luanletna suksiatna tungdinga vaihawmpuk ahi.

²³TOUPA, Sepaihte TOUPA’N, tawpna, tawpna tung ngei ding a vaihawmpuk, lei tengteng laizang ah a bawl ding hi.

²⁴Huaiziak in, TOUPA, Sepaihte TOUPA’N, hichi in a chi, “Zion a om ka mite aw, Aigupta gam a a hih bang un khetbuka nou honvua in a chiang na tung uah lik mahleh, Assuriami kihta kei un.

²⁵Sawtlouchik nung in ka lungkimlouhna a hong bei dia, ka hehna leng amaute hih manthatna dia hei in a omta ding hi.

²⁶Oreb suangpi a Midiante a thahlai bang un sepaihte TOUPA’N amah sual ding in zepna a pei ding a; a chiang lah tuipi tunglam ah a om ding a Aigupta gam a a pei bang in a pei ding hi.

²⁷Huai ni’n hichi ahi ding a, puakgik na liangzang a kipan a lakmang in a om ding a, a hakkol leng na ngawng a kipan a lakmang in a omlai ding hi; thaunilh ziak in hakkol lah hihsiat in a omta ding” chi in.

²⁸Rimmon a kipan Aiath khua a tungta Migron khua ah a paisuakta; Mikmash khua ah a van a koihta hi.

²⁹Guam ah a tumta uh; Geba khua ah a giakta uh; Ramah khuate a lingling ua; Saul, Gibeah khote a taimangta uhi.

³⁰Gallim tanu aw! na aw in ngaihtak in kikou in; Laish a khua aw! ngaikhia in; Anathoth aw, hehpihhuai na lawmlawm chia!

³¹Madmenah khote taimang in a omta uh; Gebim khua a omte taimang tum in a kidelh ding uhi.

³²Tuni mah in Nob khua ah a tam dia; Zion tanu tang, Jerusalem mual pawng a khut a sinkhum hi.

³³Ngai dih, TOUPA, sepaihte TOUPA’N, thil mulkimhuai tak in a hiangte a satkhe ding a, sangpipite phuk in a om ding a, a dawktuamte leng gawiniam in a om ding hi.

³⁴Sik in gamnuai sing sahte a phuk ding a, Lebanon sidar singte mithupi puk in a puk zuazua ding uhi.