Read Paite Chin ISAI 11 Bible Online

ISAI 11 - Paite Chin bible

ISAI 11

¹Jesse bul a kipan in selnou a hongpawt ding a, a zungte a kipan in a hiang a hong khangkhe ding:

²Huan TOUPA kha pilna leh theihtheihna kha, lemtheihna leh hatna kha theihna leh TOUPA launa kha a tung ah a tu ding hi.

³Huchi in a kipahna uh TOUPA launa ah ahi ding. A mit a a muh bang in vai a hawm kei ding a, a bil a a zak bang in leng a taihilh sam kei ding hi.

⁴Gentheite diktattak in vai a hawmsak zaw ding a, lei a mi thunuailutte ading in khentuam neilou in a taihilh saklai ding hi; a kam a khetbuk in lei a khen ding a, a muk a hu in migilou saloute a that ding.

⁵Diktatna a kawnggak ahi ding a, ginomna a taigakna ahi ding hi.

⁶Huchi in, ngia leh belamnou a omkhawm ding ua, gialbem kelnou toh a bokkhom ding uh, bawng nou leh humpinelkai tuailai leh ganvakthaute a omkhawm ding ua; naupangnou in a pi zungzung ding hi.

⁷Bawng leh vompi a gamta khawm ding ua; a noute uh a bokkhawm tiptep ding uhi; huan humpinelkai in bawngtal bang in buhpawl a ne ding hi.

⁸Nau nawitui nelai thangtom kaw gei ah a om hiathiat ding a, nau nawitui nek tawpsa in guldekpak kawgei ah a khut a nga ding;

⁹Ka tang siangthou ah kihihnat a omta kei ding a, kihihsiat leng a om nawn kei ding, tuipite tui a a dim gige bang in, lei TOUPA theihna in a dim ding hi.

¹⁰Huan, huai ni’n hichi ahi ding a, Jesse zung michih chiamtehna ding in a om ding a, amah mahmah namte'n a dong ding ua, a khawlna mun a thupi ding hi.

¹¹Huai ni’n hichi ahi ding a, TOUPA’N a si val omsun a mite, Assuria gam a kipan, Aigupta gam a kipan, Pathros gam a kipan, Kush gam a kipan, Elam gam a kipan, Sinar gam a kipan leh Hamath khua a kipan leh tuipi tuikulhgam a kipan, a la nawn ding a, a nihveina ding in a khut a zak nawn ding hi.

¹²Huchi in, namchih a ding in chiamtehna a takkhe ding a, Israel delhkhiakte a pikhawm ding a, Judah dalhte kawlmong li a kipan a pikhawm ding

¹³Huchi in, Ephraimte hazatna a beita ding a, Judahte hihbuai mite hih manthat in a omta ding uh; Ephraimte’n Judahte a haza nawnta kei ding ua, Judahte’n leng Ephraimte a hihbuai nawn kei ding uh.

¹⁴Huchi in, amaute tumlam ah Philistiate liangzang ah lengsukin a va tuang ding ua; suahlam mite a lokkhawm ding uh; Edom leh Moabte tung ah a khut uh a kha ding ua, Ammon suante’n a thu uh a mangta ding uh.

¹⁵TOUPA’N Aigupta tuipi lei a hihse vek ding a, Luipi leng a huihsa huthut in a khut a sinkhum ding a, luita sagihte a bawlhial in a vaw ding a, mite khepek leng kawtlou in a pai galkah ding.

¹⁶Huchi in, Aigupta gam a kipan a paitouh ni ua Israelte ading a lamlian a hongom bang in, a sibang omsun a mite ading in Assuria gam a kipan in lamlian a hongom ding hi.