Read Paite Chin ISAI 13 Bible Online

ISAI 13 - Paite Chin bible

ISAI 13

¹Babulon khaw puakgik Amoz tapa Isai in a muh thu.

²Mi liante kongpite a a lut theihna ding un tang mai velvul ah chiamtehna takkhia unla, ngaihtak in amau sam unla, khut in hih ding dan hilh un.

³Kei mahmah in ka misehte thu ka peta, ahi, ka mi hattak, ka mi kinuamsakte, ka hehna tangtung sak ding in ka samta hi.

⁴Tua! Tang a mipi husa, mipi a tam a tam husa bang mahmah! Tua! namchih gam a mi omkhawmte chiak vengvung husa! Sepaihte TOUPA’N galsual ding a sepaihte kaikhawm eive.

⁵Amaute, TOUPA leh a lungkimlouhna vanzat, gam gamlapi a kipan, kawlmong tawpna mahmah a kipan in gam tengteng hihse ding in a hongpai uhi.

⁶Mau tuaituai un; TOUPA ni a naita hi. Bangkim hihthei a kipan a siatna a hongtung bang in a hongtung ding hi.

⁷Huaiziak in khut tengteng a hat kei ding a, mihing lungtang chiteng leng a zulmang ding:

⁸Huchi in, a lau ding ua; damlouhna leh lungkimlouhnate’n amaute a man ding a; numei nauvei bang mai in a chi uh a na ding; lamdang kisa tuah in a om chiat ding uh; a melte uh meikuang mel bang ahi ding.

⁹Ngai in, gam hihse ding leh huailai a mikhialte asung a kipat a hih mangthang ding in TOUPA ni thupitak, thangpaihna leh hehna thupitak toh, a hongtung ding hi.

¹⁰Van aksite leh aksi munkipte un a vakna uh a suaksak kei ding ua; ni lah a suah lai in mialsak in a om ding a, kha in leng a vakna a vaksak kei ding hi.

¹¹Huan, khovel a gitlouhna ziak in ka gawt ding a, migilou saloute a thulimlouhna ziak un ka gawt sam ding. Mi kisathei paukhauh lah ka tawpsak ding a, mi kihtakhuai kisaktheihna lah ka niamsak lai ding hi.

¹²Mi dangkaeng siangthou sang a leng manpha zaw in ka bawl ding a, mihing mahmah lah Ophir dangkaeng siangthou sang a leng manpha zaw in ka bawl ding.

¹³Huchi in tung a van ka kisingsak ding a, sepaihte TOUPA hehna ziak in, a hehna ni thupitak ni’n, lei leng a omna mun kisuan tham in linsak in a om ding.

¹⁴Hichi ahi ding a, sakhi delh ek bang leh belam kuamah holkhawm louh bang in michih amau chipihte lamchiat a nga ding ua, michih amau gam lamchiat ah a taimang ding uh.

¹⁵Muh a om peuhmah dawt pailet in a om ding a, huan, mat a om peuhmah namsau a satpaih in a om ding.

¹⁶A naungekte uleng a mitmuh un zan dimdem khop a leisatna a zat in a om ding uh; a innte uh loh in a om dia, a zite uh leng mawksual in a om ding uh.

¹⁷Ngai in, Mediate amau sual ding in ka tokthou ding a, huaite’n dangka a limsak kei ding ua, dangkaeng leng a kipahpih kei ding uh.

¹⁸A thalpeute un tangvalte a zansak ding a; gil a gahte hehpihna himhim a neikei ding uh; a mit un naupangte a hawikei ding uh.

¹⁹Huan, Babulon, gamchih thupina, Kaldaite kisaktheihpih thil hoihtak, Pathian in Sodom leh Gomorrah a sukman lai bang in a om ding uh.

²⁰Chikchiang in leng huai ah mi a om nawnta kei ding uh, suan omlai siah in leng asung a om a omsam kei ding; Arab mite’n huai ah a puaninte uh a kai kei ding ua; belam chingte’n huai ah a belamhonte uh a kualsak kei ding uh.

²¹Gamdai a gamsate huai ah a om ding ua; a innte uh simbute inn in a dim ding a; vasa ngawngsaute huai ah a teng ding ua, sathakte huai ah a mawl leklek ding uhi.

²²Ngiate a insangte uah a ham ding ua, sihalte leng a inpi nuam mahmahte uah a ham ding uh; huan, a gawt hun ding a tung dekta a, a nite leng suksau in a omkei ding hi.