Read Paite Chin ISAI 14 Bible Online

ISAI 14 - Paite Chin bible

ISAI 14

¹TOUPA’N Jakobte a hehpih ding a, Israelte tel in amau gam ngeingei ah a omsak ding hi; Huan, gamdangmite’n amau a zui ding ua, Jakob inkuanpihte a lenkip ding uhi.

²Huchi in, michih in amau a pi ding ua, a mun ding uh a tun ding uhi; huchi in Israel inkuanpihte’n TOUPA gam ah amau salpa leh salnu in a nei ding ua; amau sal a neimite sal in a honman ding ua; amaute simmohte tung ah vai a honhawm ding uhi.

³Huan, na lungkhamna a kipan, na buaina a kipan leh nasep haksapipi a hon sepsakna ua kipan in TOUPA’N nang a hon khawlsak ni chiang in hichi ahi ding hi.

⁴Hiai pau el thu Babulon kumpipa kikoukhum in na gen ding. Bangchidan ahia, simmohhatpa daita na e! Bangchidan ahia, dangkaeng khopi daita na tel e!

⁵TOUPA’N migilou salou chiang a hihtanta, vaihawmmite lalchiang;

⁶Michih hehkawma vaw zialzial zel, michih thangpai kawm a kuamah kham ngeilouh sawina a vaihawm sak zel.

⁷Lei pumpi a khawla, a dai vungvunga; thakhat in la a sa khe guih uh.

⁸Ahi, na tungthu ziak in meilahte a nuam ua, Lebanon tang a sidar singte toh. Hihniam a na om nungsiah phukpaitu ding himhim ka kiang uah a hongtou ngei nawn kei uh, chi in.

⁹Nuailam a kipan Sheol nang hondawn ding in, nangmah ziak in a buai lutlut hi; misi, lei a makai tengteng nangmah ziak in a tokthou a; namchih kumpipa tengteng a mangtutphah ua kipan a kaidingta hi.

¹⁰Huai tengteng in nangmah bia in, na kiang ah huchi in a gen ding uh. Nang leng kou bang a hatta lou na hi maw?

¹¹Na thupi mahmahna Sheol a pikhiak suk ahita, na kaihging lunglungte toh; tangtel na nuai ah a phah ua, than in nang a hon khuhta uhi, chi in.

¹²Sun Aksi aw, Zingsang tapa, bangchidan ahia van a kipan na kiaktak maimah! Namchih hihpukpa, bangchidan ahia lei a satkhiak suk a na om maimah!

¹³Na lungtang in, Van ah ka kah ding a, Pathian aksite tunglam ah ka mangtutphah ka tawisang ding; huan, kikhopna tang, mal tawp a om ah, ka tu ding a;

¹⁴Meipi sang a sang ah ka kah ding a; Tungnungpen bang mai in ka om ding, na chinak vial a.

¹⁵Himahleh, Sheol ah, kawkhuk tawp ah, pikhiak suk a om ding na hi ngal a.

¹⁶A hon mu peuh in a hon lim et ding ua, hiai mi maw lei hihling a, gamchih kising sak a,

¹⁷Khovel gamdai bang a bawl a, a khua omte hihmang a, a salte a inn lam ua paidia pawtsak ngeilou? chi in, na tanchin a sut ding uhi.

¹⁸Namchih kumpipa tengteng, avek un, amau inn chiat uah thupitak in a ihmu ua,

¹⁹Nang bel a hunlou a piang kihhuaitak bang in leh, galthah, namsau a sut pailet, kawkhuk a thante lak a paisukte puansilh bang in na han in a kipan gamlapi a paih khiak in na om zawta hi; luang sikden bang mai in.

²⁰Na gam na hihsiat a, na khua na tuite na thah ziak in a lak ua vui in nang zaw na omkei ding hi. Thil hoihlou hihmite suante min tangtawn in a lou ngeikei ding uh.

²¹A kisak ua, lei a neih ua, leitung khopi a a dimsak louhna ding un, a pipute uh khelhna ziak in a tate uh thah ding ngaihtuah un, chi in.

²²Huan, “Amaute sual ding in ka kisa ding, sepaihte TOUPA’N a chi, Babulon a kipan min leh, a omlaisunte leh, tapa leh tapa’ tapa ka hihmang ding, TOUPA’N a chi.

²³Sakuh ading in gou in ka bawl ding a, dilte ah leng ka bawl ding; hihmanna munphiat in ka phiat lai ding” sepaihte TOUPA’N a chi.

²⁴Sepaihte TOUPA’N hichibang a gen in a kichiamta, “Pellou in ka ngaihtuah bangtak in a hongtung ding; ka seh bangtak in leng a om ding;

²⁵Ka gam ah Assuria mi ka hihse ding a, ka tangte ah ka chil ek ding a chih bang in; huai hun chiang in a hakkol uh amau a kipan a mangta ding a, a puakgik uh a liangzang ua kipan in a mangsam ding hi.

²⁶Huai ahi, lei pumpi a thuseh, huai mah ahi, namchih tung a khutzak.

²⁷Sepaihte TOUPA’N a septa ngal a, kuan a sut dia? A khutzak in a omta, kuan a laknawn sak dia?” chi in.

²⁸Kumpipa Ahaz sih kum in hiai puakgik a hong omta.

²⁹Philistia gam pumpi aw, nangmah vuakna chiang a kitan tak ziak in kipak ken: gul zung a kipan in guldekpak a pawt ding a, a gah gul kuang leng thei a honghi ding hi.

³⁰Mi genthei tamasate’n a ne un a ta ding ua, mi tagahte leng bittak in a om ding uh; nang a zung bel kial in ka that ding a, nang a omsunte thah in a om ding uh.

³¹Kongkhak aw, mau tuaituai in; khopi aw, kikou in; Philistia aw, na pum in na zulmang khinta; mallam a kipan in lah meikhu a hongpawt ngal a, a hun seh uah tuantual himhim a om ngeikei uhi.

³²Philistia nam palaite bangchibang in i dawng ding ua? TOUPA’N Zion lah a tungdinga, a mite lak a gentheite’n bitna a mu uh, i chi ding uhi.