Read Paite Chin ISAI 15 Bible Online

ISAI 15 - Paite Chin bible

ISAI 15

¹Moab gam puakgik. Zan khat thu in Moab gam a Ar khua suksiat in a om a, bangmahlou a bawl in a omta hi; zan khat thu in Moab gam a Kir khua suksiat in a om a, bangmahlou a bawl in a omta hi.

²Dibon tanu, mun sangte a kap ding in a hoh touta a; Moabte’n Nebo leh Medeba a kahkhum ua, a lu tengteng uh a giau vek a, a khamul teng uleng met in a om vekta hi.

³A kongzingte uah saiip puan a teng ua: a intungte uah leh a kholak uah michih nakpi’n a mau tuaituai uhi.

⁴Heshbonte leng a kikou ua, Elealehte toh; Jahaz kholam in leng a aw uh a za uhi: huaiziak in Moabte galvan a kivante ngaihtak in a kikou ua; a hinna uh asung uah a ling hi.

⁵Moabte ziak in ka lungtang a kikou a; a mi hoihte uh Zoar leh Eglath shelishijah khuate ah a tai ua: Luhith tou ah kap kawm in a paitou ua; Horonaim lampi ah siatna kikou in a kikou khia uhi.

⁶Nimrim tuite hihsiat a om ding ahi: loupa a vuaikhinta; loupa selnoute a vuai a, thilhing a omta kei hi.

⁷Huaiziak in, a sum neihsunte uleh a koih hoihte uh Muisum Lui gal a kai mang pih uhi.

⁸Kikou husa Moab gamgi kim ah a thang ngal a; a mau tuaituai husa Eglaim khua a tungta hi.

⁹Dimon tuite sisan in a dim vek ngal a: Dimon tung ah thil thupi sem tungsak ding ka hi, Moabte lak a taikhiate tung ah leh, huai gam a omsunte tung ah humpinelkai ka tungsak ding hi.