Read Paite Chin ISAI 16 Bible Online

ISAI 16 - Paite Chin bible

ISAI 16

¹Gam vaihawmmi ading in belamnoute Sela khua gamdai a om a kipan in Zion tanu tang ah khak un.

²Huchi in, Moab tanute vasa a bu a kipan dalh a lengleng bang in Arnon lui kainate ah a om ding uhi.

³Thu honhilh inla, vai hon hawmsak in: na lim sunlai in zan bang in bawl inla; delhkhiakte sel in; taimangte mansak ken.

⁴Moab lak a mi delhkhiak a omte na kiang ah om uhen; amau ading in hihsemi mel a kipan bukna mun hi hen: lepgumi lah bangmahlou a bawl in a omta ngal a, hihsiatna a daita a, nuaisiahnate gam a kipan a hih manthat in a omta uhi.

⁵Huchi in mangtutphah hehpihna a hihkip in a om ding a, huai tung ah, David puanin ah, mi khat, vaihawm in, vaihawmna diktat zong in, thil diktat kintak a hihpah in, chihtaktak in a tu ding hi.

⁶Moabte kisaktheihna thu, a kisathei mahmah uh chih, ka za ua: a suahngal dan uleh, a kisaktheih dan uleh, a hehdanthu uh; a kiawtsaknate uh bangmah ahi kei hi.

⁷Huaiziak in Moab tung ah Moab a mau tuaituai ding ua, michih a mau tuaituai ding uh: Kir hareseth grep beu khase tuntun in na kah ding uhi.

⁸Heshbon loute lah a tulkhinta a, Sibmah grepgui toh: namchih Kumpipate’n a kung hoih tata a kitansak phengphung ua: Jazer khaw tanpha in a zam ua, gamdai ah a zamlut ua; a hiangte a zamdalh sengsung ua, tuipi ah a zam galkahta uhi.

⁹Huaiziak in Sibmah grepgui Jazer kah in ka kah ding a: Heshbon leh Elealeh aw, ka khitui in ka hon buak ding: na nipi gahte tung leh na buh tung ah kisual kikou husa a keta ngal a.

¹⁰Kipahna laksak in a omta, lou hoihtak a kipan in leng nopna laksak in a omta a; grephuan ah lasak himhim a omta kei ding a, husa noptuak himhim leng a omnawn sam kei ding: grep sukna khukte ah chil a sukmi himhim in uain a chilkhe takei ding uh; grep la a kikou ka daisakta hi.

¹¹Huaiziak in ka gilte lah Moab hehpihna in pekging bang in a ging a, ka gilsung lah Kir hareseth hehpihna in pekging bang in a ginglai hi.

¹²Huchi in, hichi ahi ding a, Moab a kilat chiang in mun sang a kihihgim a, thum ding a a Mun Siangthou a a hongpai chiang in a vuaksuak ding hi.

¹³Huaite Moab tungthu TOUPA’N tuma a a gen ahi.

¹⁴Tuin bel TOUPA’N, kilohmi kum sim a kum thum sung in Moab, thupina, a mipi thupitakte nasan in, muhsithuai a omsak in a om ding a; a omsunte tawmchik mahmah, gen thamlouh ahi ding uh, chi’n a genta hi.