Read Paite Chin ISAI 17 Bible Online

ISAI 17 - Paite Chin bible

ISAI 17

¹Damaska khaw puak gik, Ngai in, Damaska khopi hi nawnlou ding a lakmang ahita, huchi in inn chimsia koihkhawm lel ahita ding hi.

²Aroer khote taisan in a omta; belamhonte omna ding ahimai ding, huaite lah a om ngei ding ua, kuamah in a lausak kei ding uh.

³Ephraim a kipan kulhpi a mang ding a, Damaska a kipan gam a mang ding, Suria gam a omsunte leng a mang ding uh; Israel suante thupina banglel in a om ding uh, sepaihte TOUPA’N a chi hi.

⁴Huai ni chiang in hichi ahi ding a, Jakob thupina hihgawn in a om ding a, a sa thauna leng a hong gawngta ding hi.

⁵Huchi in buh lapan buh a lak a, a vuite a lak bang mai ahi ding a, ahi, Rephaim guam ah min buh maihkhakte a tom bang mai uh ahi ding hi.

⁶Himahleh, olive singgah lohkhit a a zikpi dawn a gah nih hiam thum hiam omlai bang leh, singgah hiang hoih li hiam nga hiam a omsek bang in, maihkhak top ding a omlai ding, TOUPA Pathian in a chi hi.

⁷Huai ni chiang in min a Bawlpa uh lam a enta ding ua, a mitte un Israelte Mi Siangthou a zahtakta ding uh.

⁸Maitam, amau khutsuakte lam a en nawnta kei ding ua, amau khut a bawl Asherim hiam, gimlim maitamte hiam a zahtak nawnta kei ding uhi.

⁹Huai ni chiang in a khopi kiptakte uh gammang leh tang vum a mun taisan sa, Israel suante ma a a taisansa bang uh, ahi ding; huchi in munloih ahita ding hi.

¹⁰Nang hon hondampa Pathian na mangngilh a, na hatna Suangpi lah na theigige kei hi; huaiziak in singkung kilawm taktakte na suan ding a, asung ah hiang tuamte na vut paisuak ding hi:

¹¹Na suan ni’n na khang sak a, zingsang in thil chil ah na paksak a; himahleh gahloh lah lungngaihna leh natna thupitak ni’n a mang hi.

¹²A! mipi tampi ging zuazua, tuipite ging zuazua bang a ging zuazuate leh namchih ging hawhaw, tui thupitakte ging hawhaw bang a ging hawhawte na tung uh a gik hi!

¹³Namchih lah tuipi tampi ging hawhaw bang in a ging hawhaw ding ua; himahleh aman a taihilh ding a, huchi in gamlapi ah a taimang ding ua, tang a buhsi huih mut bang leh leivui huihpi mut leng lunglung bang in delh in a om ding uhi.

¹⁴Nitaklam in, ngai in, thil mulkimhuaitak a om a; huan, khovak ma in lah a om nawn kei uh. Huai gallak a hon laksak mite tan ahi a, hon guksak mite tuam leng ahi hi.