Read Paite Chin ISAI 18 Bible Online

ISAI 18 - Paite Chin bible

ISAI 18

¹Ethiopia gam khen a luigal a om, a khazap ging hawhaw gam tung a gik hi.

²Tuipi ah, tui tung a tolh longte ah palaite sawlpa! Misawl hattakte aw, nam sang zehzoh mam hethot kiang ah, a pawt tung ua kipan tutan a mi kihtakhuai takte kiang ah, hoh un; nam in gam a hawm ua, a palpuk uhi, a gam uh luite’n a hawmzak hi.

³Khovel a om tengteng leh lei a tengte aw, tangte a chiamtehna a takkhiak chiang un en un; pengkul a mut chiang un ngaikhia un.

⁴TOUPA’N ka kiang ah hichi in a chi hi, Ka om kinken ding a, ka omna ah ka en gige ding a; nisatlai a kholum huthut bang leh buhlak kholum lai a daitui mei bang in, chi in.

⁵Grep loh hun ma a, a pak a bei a, a pak grep puam a a hongom chiang in, a hiang noute theikung attanna temta in a attan sin ngal a, a hiang zam dalhte a lamang in a sattan lai ding hi.

⁶Huaite tang a vasa sa ne chite ading in, lei a sate ading in nutsiat in a om ding uh; huchi in vasa sa ne chite’n amaute nipi sung in a ne ding ua, lei a sa tengteng in phalbi sung in a ne ding uhi.

⁷Huai hun chiang in, sepaihte TOUPA min omna mun, Zion tang ah, sepaihte TOUPA kiang a piak ding in mi sang zehzoh nam, mam pekpokte’n, kipahman a hontawi ding ua; nam a hih ua kipan kihtakhuai tak leh pautuam nei ahi uhi. Huai nam in gam a hawmzel ua, a palpuk behlap lai ua, a gam ulah luite’n a hawmzak hi.