Read Paite Chin ISAI 19 Bible Online

ISAI 19 - Paite Chin bible

ISAI 19

¹Aigupta gam puakgik, Ngai in, TOUPA meipi hattak tung a tuang in, Aigupta gam a hongtungta, Aigupta gam milimte a ma ah a ling vonvon ding ua, Aiguptate lungtang lah asung uah a zulmang mai ding hi.

²Aigupta mite Aigupta mite mah sual ding in ka tokthou ding a; huchi in michih in amau unau sual in michih in amau invengte sual in, a kidou ding uh; khua leh khua a kidou ding ua, gam leh gam a kidou ding uhi.

³Huchi in, Aiguptate kha asung uah bangmahlou a bawl in a om ding a; a thusawm uh ka hihse ding; huchi in, milimte leh, bumsiamte thu a dong ding uhi.

⁴Aigupta mite heutu tatsetak khut ah ka pekhe ding a; huchi in kumpipa hangsan in a tung uah vai a hawmta ding, TOUPA, sepaihte TOUPA’N a chi hi.

⁵Tuipi tuite a kang ding ua, luite luang mang in a kangtatta ding.

⁶Luite a namsia ua; Aigupta gam tuiluangte a kiam hiaihiai ding ua, a kangtat ding a; phailuangte leh tui loupate a vuai khin ding uhi.

⁷Nile lui kiang a Nile lui gei mahmah a, gantatna pawnte leh, Nile lui kiang a thil chin tengtengte a hong keu vek ding a, taihmang in a om ding a, a om nawn kei ding hi.

⁸Ngamanmite leng a kap ding ua, Nile lui a ngakuai khaimi tengteng in a awm uh a kitum ding ua, tui a lenpi zakte a thadahgawpta ding uhi.

⁹Huailou in leng jija hiahsiang khoih mite leh puanngou gan mite a zahlak ding uhi.

¹⁰A suangkhuamte hihzan in a om ding a, kilohmite a lungsim un a lungkham ding uh.

¹¹Zoan khua a miliante a hai ding ua, Pharo mi pil pente lemtheihna sa lemtheihna banglel a hong hita: Pharo kiang ah, mi pil tapa, nidanglai kumpipate tapa ka hi, bangchidan a chi sek na hi ua?

¹²Na mipilte koi a om ahi ua? Amau honhilh pah ngal uhen; Aigupta gam tung a thil tung ding, sepaihte TOUPA sehte, thei uhen.

¹³Zoan khua a miliante mihai a hong hita ua, Noph khua a miliante khem in a omta uh; Aigupta namte ning a suangte’n Aiguptate a vakmang sakta a.

¹⁴TOUPA’N Aiguptate lak ah phengphitna kha a omsakta; huchi in zukham mi a luak a a hoi doidoi bang in Aiguptate a nasep chiteng uah a paikawi sakta uhi.

¹⁵Aiguptate ading in lutang in hiam, mei in hiam, tumnah hiang in hiam, pumpeng in hiam a sepsak theih a om nawnta kei ding hi.

¹⁶Huai ni chiang in Aigupta numeite bang ahi ding ua: Sepaihte TOUPA khut sin a tung ua a kisin ziak in a ling un a lau ding uhi.

¹⁷Judah gam a omte Aiguptate ading in mulkimhuaitak a hong hita ding ua, a min uh a lohna peuh uah a kihta ding ua, amau tung a tung ding sepaihte TOUPA thuseh ziak in.

¹⁸Huai ni chiang in Kanante pau a pau leh, sepaihte TOUPA kiang ah kichiamna thuchiam sekte, Aigupta gamsung ah khaw nga a om ding a: khat tuh Ni Khopi a chi ding uhi.

¹⁹Huai ni chiang in Aigupta laitak ah TOUPA ading in maitam a om ding a, a gamgi ah TOUPA ading in suangphuh a om ding hi.

²⁰Huai Aigupta gam a sepaihte TOUPA ading in chiamtehna leh theihna ahi ding: nuaisiahte ziak in TOUPA a sam ding uhi, huchi in aman hondampa leh humbitpa a sawl ding a, aman amaute a honkhe ding hi.

²¹Huchi in TOUPA tuh Aiguptate theih ahita ding a, Aigupta mite’n huai ni chiang in TOUPA a theita ding uh: ahi, kithoihna leh thilpiak in a be ding ua, Toupa kiang ah thu a chiam ding ua, a tangtun lai ding uhi.

²²Huan, TOUPA’N Aiguptate a vaw ding a, a vaw ding a, a hihdam lai ding; huchi in TOUPA kiang ah a kiknawn ding ua, aman a ngetnate za in amaute a hihdam ding hi.

²³Huai ni chiang in Aigupta gam a kipan in Assuria gam pha in lamlian a om ding a; huchi in Assuria mite Aigupta gam ah a hoh ding uh; Aigupta leng Assuria gam ah a hoh ding uh. Aigupta mite’n Assuria mite toh Pathian a be khawmta ding uhi.

²⁴Huai ni chiang in Israelte Aiguptate leh Assuriate toh a thumna ahi ding ua, lei laizang tak ah vualzawlna ahi ding uh:

²⁵Sepaihte TOUPA’N, ka mi Aiguptate leh ka khut suak Assuriate leh ka goutan Israelte vualzawl in om uhen, chi in, a vualzawl hi.