Read Paite Chin ISAI 2 Bible Online

ISAI 2 - Paite Chin bible

ISAI 2

¹Amoz tapa Isai in Judah leh Jerusalem tungtang thu a muh:

²Ni nanungte ah hichi ahi ding a, TOUPA inn omna tang tuh tang lian tungte ah hihkip in a om ding a, tangneu kha khate tung ah leng tawisan in a om ding; huai ah namchihte a hoh ding uhi.

³Huan, chi tampite a hoh ding ua, Hongpai unla, TOUPA tang ah, Jakob Pathian inn ah, i hohtou ding uh; aman a lamte tanchinte a hon sinsak ding a, a lampite ah i pai ding, a chi ding uh; Zion a kipan in danthu a hongpawt ding a, TOUPA thu Jerusalem a pan a hongpawt ding hi.

⁴Huchi in, aman namchih lak ah vai a hawm ding a, chi tampi tak leng a taihilh ding: a temsaute uh leilehna mukzum di’n a sek ding uh: namdang in namdang tung ah namsau a likta kei ding a, kidou dan leng a sin kei ding uhi.

⁵Jakob inkuanpihte aw, hongpai un TOUPA vak ah i khosa ding uh.

⁶Suahlam a kipan a dan hongpawtta a, a na dim ua, Philistiate bang a aisansiamte a hih ua, gamdang mite tate toh khut a kilet ziak un, Na mi, Jakob inkuanpihte, lah na paisanta hi.

⁷A gam uh dangka leh dangkaeng in a dim a, a sumte ulah simseng vual ahi kei; a gam uh sakol in a dim a, a kangtalaite ulah simseng vual ahi kei hi.

⁸A gam uh milim in a dim a; a khut ua a sep khiak uh, a khutzungte ua a bawl uh, a besek uhi.

⁹Mi neute hihniam in a om ua, mi liante leng niamsak in a om uh: huaiziak in amau ngaidam ken.

¹⁰TOUPA kihtakhuaina a kipan leh a kilawmna thupina a kipan suangpi ah lut unla, leivui ah kibu un.

¹¹Mihing kideihnate hihniam in a om ding a, mite kisaktheihna niamsak in a om ding, huai ni’n TOUPA kia tawisan in a om ding hi.

¹²Sepaihte TOUPA ni lah kingaisang leh kisathei tengteng tung ah leh tawisang a om tengteng tung ah a om ding a; huchi in, niamsak in a om ding uh:

¹³Lebanon tang a sidar sing sang pipite leh tawisang a om tengteng tung ah, Bashan gam a tosaw tengteng tung ah,

¹⁴Tang lian sangpipite tung ah, tang neu tawisang a om tengteng tung ah,

¹⁵Inn sang sangpipite tung ah, kulh bang tengteng tung ah

¹⁶Tarsish long lian tengteng tung ah, thil lim deihhuai tengteng tung ah leng hongom ding hi.

¹⁷Mihing kideihnate hihniam in a om ding a, mite kisaktheihna niamsak in a om ding. Huaini in TOUPA kia tawisang in a om ding.

¹⁸Milimte a mang vengveng ding hi.

¹⁹Huan, lei nakpipi a lingsak ding a a thoh hun chiang in, TOUPA kihtakhuaina a kipan leh a kilawmna thupina a kipan in mite suangpi hawmte leh lei kawhawmte ah a lut ding uhi.

²⁰Huai ni’n mite’n a dangka milimte uleh a dangkaeng milimte uh, biak ding a a bawlsak uh, buite leh bakte kiang ah a pai ding uh;

²¹Lei nakpipi a lingsak ding a a thoh hun chiang in, TOUPA kihtakhuaina a kipan leh a kilawmna thupina a kipan in, suangpihawmte leh kawl suangpi hawmte ah a lut ding uhi.

²²A nak vang ua hu om mihing muan tawpsanta un: Banglam ah ahia muantak a hih mahmah uh?