Read Paite Chin ISAI 21 Bible Online

ISAI 21 - Paite Chin bible

ISAI 21

¹Tuipi gamdai puakgik, Sim gam a pingpei a paisuak bang in gamdai a kipan in, gam lauhuaipi a kipan in a honghi.

²Kilakna thu khauhtak ka kiang ah theihsak ahita; lepchiahtak a hihmi in lepchiahtak in a hih a, lokmi in a lok hi, Elamte aw, paitou un, Mediate aw, um un; a thumna tengteng uh ka daisakta hi.

³Huaiziak in ka kawng natna thupitak in a dim a, numei nauvei natna bang a natna in a hon manta; bil a za theilou khop in na ka thuak a; khaw mutheilou khop in ka mangbang hi.

⁴Ka lungtang a ha huaihuai a, thil mulkimhuai tak in a hon hihlau a; nitak ninem ka ngaklah sek kei ding in linna a hongsuakta.

⁵Dohkan a bawlkhol ua, galvengmi a vengsak ua, a ne ua, a dawn ua; mi liante aw, thou unla, lum thau nuh un.

⁶TOUPA’N ka kiang ah huchi in a gen hi, Kuan inla, galvengmi vengsak in, aman a thilmuh gen hen;

⁷Sepaih a pawlte, sakol tungtuang a kopkop a paite sabiltung pawlte, sangawngsau pawlte, a muh chiang in pilvangtak in a ngaikhe kilkel ding, chi in.

⁸Huan, amah humpinelkai bang in a kikou a; TOUPA aw, sun in galven buk tung ah ka ding a, zan khua in ka venna ah n’on omsak gige a;

⁹Ngai in, hiai lai ah mihing pawl, sakol tungtuang a kopkop a pai a hong uh, chi in. Amahmah in Babulon khua a pukta, a pukta, a milim pathian bawltawmte tengteng uh lei ah hihzan in a omta, chi in, a dawng hi.

¹⁰Aw ka buh vuaksa, ka phual a buh; sepaihte TOUPA, Israelte Pathian a kipan a ka zak na kiang ua pulak ka hi.

¹¹Dumah puak gik. Min Seir tang a kipan in a honsam ua, “Galvengpa zan bangchi ahita a? Galvengpa, zan bangchi ahita a?” chi in

¹²Galvengpa’n, “Zingsang hi ding ahita, zan leng; na dot nop uleh dong un; kihei nawn unla, hongpai un” a chi hi.

¹³Arabia gam tung a puakgik, Dedante khualzin pawlchihte aw, Arabia gam a gamnuai ah na giak ding uh.

¹⁴Dangtak kiang ah tui a hontawi ding ua, Tema gam a omte’n a an un taimangte a na dawn uhi.

¹⁵Amau lah namsaute a kipan, namsau dohsa a kipan leh, thalpeu laisa a kipan leh, kidouna thupitak a kipan a taimang uhi.

¹⁶TOUPA’N lah huchi in ka kiang ah a chi ngal a, Kilohmi kumsim a kum khat sung in Kedarte thupina tengteng a mangkhin ding hi,

¹⁷Thalkapmi, Kedar suante lak a mi hattak omsunte, tawmchik ahi ding uh; TOUPA Israelte Pathian in, huai a genta hi, chi in.