Read Paite Chin ISAI 22 Bible Online

ISAI 22 - Paite Chin bible

ISAI 22

¹Kilanna guam puak gik, Bang na chi ua a mai, in tung a na kal touh vek uh?

²Aw kikou husa a dim, khopi chiak vengvung, khaw kipaktak, na sung a a thahte uh namsau a thah ahi kei ua, kidouna a si leng ahi sam kei uh.

³Na vaihawmmi tengteng a taimang chiat ua, thalkap mite gak in a om ua, gamlapi a kipan a hong taimangte.

⁴Huaiziak in ken, hon enlou in lehlam en un, nakpi’n ka kap ding; ka mite tanu gallak a a lak thu uah hon nem vanglak dah un, ka chi hi.

⁵TOUPA, sepaihte TOUPA a kipan in kilakna guam ah buaina leh sikdenna leh mangbatna ni lah ahi ngal a; kulhpi bang hihsiatna leh tangte sapna.

⁶Huchi in, Elamte’n thalbawm a tawi ua, mihing tuanna kangtalaite leh sakol tungtuangmite toh; Kirte’n lum tuamna lah a phel uhi.

⁷Huan, hichi ahi a, na guam hoihpente lah kangtalai in a dimta a, sakol tungtuangmite lah kulh kongkhak bul ah a kiphu noinoi uh. Huan, Judahte khuhna a lamang hi.

⁸Judahte khuhna a la mangta. Huchi in huai ni’n gammang inn a galthuamna lam na enta uhi.

⁹David khopi kulhpi siatnate leng na en ua, a tam chih na thei uh: huchi in dil khangnung zaw tuite na luangkhawm sak uhi.

¹⁰Jerusalem innte na sim ua, kulhpi bang bawlhoihna ding in innte na phel uhi.

¹¹Dil lui tui omna ding in kulhpi nih kikal ah tuichin khawmna na bawl ua; himahleh huai hihmi lam na en kei ua, nidanglai a a na bawlpa na limsak hetkei uhi.

¹²Huai ni’n TOUPA, sepaihte TOUPA’N, kap ding leh awm kitum ding leh lugiau sak ding leh saiip puan teng ding in a sam a:

¹³Himahleh, ngai in, nuamna leh kipahnate, bawng thahna leh belam thahnate, sa nekna leh uain dawnnate a om zawta a, ne ni, dawn ni, zingchiang a si ding i hi ngal ua, a chi uhi.

¹⁴Huchi in sepaihte TOUPA tuh ka bil ah a kilak a, Pellou in hiai khelhna na sih masiah uh na lak uah silsiang ahita kei ding, TOUPA, sepaihte TOUPA’N a chi, chi in.

¹⁵TOUPA, sepaihte TOUPA’N, hichi in a chi, Kuan inla, hiai sumkempa kiang ah, Shebna, inn tung a heutu a om kiang ngeingei ah, hoh in.

¹⁶A kiang ah huchi in gen in, Hiai a bang hih na hia? Hiai ah kua na nei a, han hiai a na khuak vial? Amah ading in sangpi a a han a khuak a, amah ading a suangpi a omna a bawl vial!

¹⁷Ngai in, TOUPA’N nang a paih in a honpai ek ding, mi hat in a paih bang in; ahi, a tun in nang a hontun ding hi.

¹⁸Pellou in aman nang lum bang in a honpei ding a, gam zapi ah a honvawk lut ding: huai ah na si ding a, huailai mah ah, nang, na pu inn sung zahlaksakpa, na thupina kangtalaite a om ding hi.

¹⁹Na nasepna a kipan k’on delhkhe ding a, aman heutu na hihna a kipan a honkai khesuk ding hi.

²⁰Huai ni’n hichi ahi ding a, ka sikha Eliakim, Hilkiah tapa, ka sam ding a; amah na puanaktual ka silh sak ding a.

²¹Na kawnggak in ka hihhat ding a, na vaihawmna amah khut ah ka kem sak ding: Huchi in Jerusalem a omte adin leh Judah inkuanpihte ading in pa ahi ding.

²²Huan, David inkuanpihte tahbi a liangzang ah ka koih ding a: aman a hong ding a, kuamah in a khak kei ding uh: a khak ding a, kuamah in a hong kei ding uh.

²³Amah kilhna mun kiptak a a kilh ngiungeu bang un, ka hihkip ngiungeu ding a: huchi in amah a pa inkuanpihte ading in mangtutphah thupi mahmah a ding ahi ding hi.

²⁴Amah ah a pa inkuanpihte thupina tengteng a bang vek ding ua, a tate leh a suante, tuium-belsuan neu chiteng, belhbu tuium-belsuan a kipan tui koihna tuium-belsuan tengteng tan in.

²⁵Huai ni’n, kilhna, mun kiptak a kilh ngiungeu a om in a nangzou kei ding a; satkhiak a om in, a keta ding a, a tung a thil gik om lah hih manthat in a omta ding a; TOUPA’N huai lah a genta ngal a, sepaihte TOUPA’N a chi, chi in.