Read Paite Chin ISAI 23 Bible Online

ISAI 23 - Paite Chin bible

ISAI 23

¹Tura khaw puakgik. Tarsish long liante aw, mau tuaituai un; innte omlou khop leh lutna ding omlou khop a hihsiat in a omta hi; huai lah Kittim gam a kipan in a kiang ua hihlat in a om hi.

²Tuikulh a omte aw, dai sipsip un; Sidon khaw sumsin tuipi a paite’n a hon kiningchin sak uh.

³Sihor apan buhchi tuipite tung ah honpua a, Nile lui a buh, a punna hi a, namchih sumsinna mun ahi hi.

⁴Sidon aw, zum in; tuipi kulhpi in, thu a genta ngal a, “Nau ka vei ngeikei a, ka nei ngei sam kei, tangval lah ka vak ngei sam kei a, nungak leng ka khanglian sak ngei sam kei hi” chi in.

⁵Thuthang Aigupta gam a tun hun chiang in Tura thuthang a nak vei mahmah ding uhi.

⁶Tarsish ah va hoh unla; Tuikulha omte aw, mau tuaituai un.

⁷Hiai maw na khaw kipak uh, a upat a upa, a khe in gamlapi a om ding a a pi sek?

⁸Lallukhu khusaktu khua Tura tung ah kuan ahia hiai tung ding a sep? Huailai a sumsinmite lah miliante ahi ua, huailai a sumsinmite lah lei a mi zahtakhuaite ahi uhi.

⁹Sepaihte TOUPA’N, thupina tengteng kisaktheihna nawngkai sak ding leh, lei a mi zahtakhuai tengteng muhsithuai a omsak ding in, a sep hi.

¹⁰Tarsish tanu aw, Nile lui bang in na gam ah luang let in; na kawnggakna himhim lah a omta kei hi.

¹¹Tuipi tung ah a khut a zak a, gamte a lingsak a; TOUPA’N Kanaan gam tungtang ah thu a pia a, a kulhte hihse ding in.

¹²Aman, “Sidon tanu nungak aw, mi nuaisiah, nuam na sa nawn kei ding; thou inla, Kittim gam ah galkah in; huai ah leng khawlna himhim na mu tuankei ding hi” a chi hi.

¹³En in, Kaldaite gam; hiai mite a omta kei uh; Assuria mi in gamdai a gamsate ading in a septa hi; a insangte uh a lam ua, huai a inpite a hihmang ua, in sia in a bawlta.

¹⁴Tarsish longpite aw, mau tuaituai un; na kulhte uh hihsiat in a omta hi.

¹⁵Huai ni’n hichi ahi ding a, Tura khua, kumpipa khat kum sim a, kum sawmsagih sung mangngilh in a om ding; kum sawmsagih beinung in kizuak la a a gen bang un Tura khaw tung ah a hongtung ding.

¹⁶Nang kizuak mite mangngilhsa nung, kaihging la inla, khaw kim ah vak in, kaihging kai inla, theih a na om nawn theihna ding in la tampi sa in.

¹⁷Huan, kum sawmsagih a beinung in hichi ahi ding a, TOUPA’N Tura khua a pha ding a, huchi in huai minu a loh delh in a om nawn ding a, leitung a khovel gam tengteng lak ah kizuak in a om ding.

¹⁸A sum muhkhiak leh a loh TOUPA ading in thil siangthou ahi ding; huailah kholkhawm in hiam, koihkhawm in hiam a omkei ding a, a sum muhkhiak TOUPA ma a omte ading in ahi ding a, niang leh tai a a nekding uleh, puansilh thupitak a neih theihna ding uh ahi.