Read Paite Chin ISAI 24 Bible Online

ISAI 24 - Paite Chin bible

ISAI 24

¹Ngai in, TOUPA’N lei a awngsak in, a sesak ding a, a lumlet ding a, a omte a dalhsak ding hi.

²Huan, vantang tung a om bang in siampu tung ah leng a om ding; sikhapa tung a a om bang in a pu tung ah leng a om ding; sikhanu tung a om bang in a pi tung ah leng a om ding; a leimi tung a a om bang in, a khawngmi tung ah leng a om ding; leitawisakmi tung a a om bang in, leitawimi tung ah leng a om ding; a pung delh a leitawisakmi tung a a om bang in, a kiang a a pung pemi tung ah leng a om ding.

³Lei lah awnsak keuhkeuh in leh hihsiat dimdem in a om ding; TOUPA’N a chita hi.

⁴Lei lah a kap in a tul a khovel lah bah in a tul a, lei a mi tungnungte a bah uhi.

⁵Lei lah a ommite nuai ah a buahkhinta; dante ah a talek ua, thuseh lah a hihlamdang ua, tangtawn thukhuna a tatlek ziak un.

⁶Huaiziak in hamsiat in lei a nekhina, a ommite lah siam louh tansakin a omta uh: huaiziak in lei a ommite lah a kanglum ua, mi tawmchik kia a omlai uh.

⁷Uain thak lah a kap a, grepgui lah a bah a, lungtang nuamte tengteng a mau uhi.

⁸Khuangtate kipahna lah a dai a, kaihging nuamsa ging lah a daita.

⁹Lasa kawm in uain a dawn kei ding uh: zu lah a dawnmite ading in a kha mahmah ding.

¹⁰Buaina khopi chipsak in a omta: kuamah a lut louhna ding un in chih khak in a omta.

¹¹Uain ziak in kongzingte ah kap husa a om a: nuamna tengteng mialsak in a om a, hiai gam nopna a mangta.

¹²Khopi ah siatna nutsiat in a om a, a kulh kongkhak vuak siat in a omta.

¹³Lei laitak ah michih lak ah huchi in a om ding hi, olive sing vuak nung a gah a omlai bang in leh, grep loh nung a grep maih loh ding a omlai bang in.

¹⁴Huaite’n a aw uh a suah ding ua, a kikou ding uh; TOUPA thupina ziak in tuipi a kipan in ngaihtak in a kikou ding uh.

¹⁵Huaiziak in TOUPA tuh Suahlam ah pahtawi un. TOUPA, Israelte Pathian min mahmah, tuipi tuikulh gamte ah pahtawi un.

¹⁶Kawlmong tawp a lasak i za, Mi diktatte kiang ah thupina om hen, chih la. Himahleh, ken bel, Ka gawng huaihuai a, ka gawng huaihuai a, ka tung gik hi! Lepchiahtak a gamtamite’n lepchiahtak in a hih ua; ahi, lepchiahtak a gamtamite’n lepchiahtak in a hih uhi, ka chi hi.

¹⁷Lei a om aw, lauhuainate, kawkhukte, thangte na tung ah a om hi.

¹⁸Huchi in hichi ahi ding a, lauhuai husa a kipan a taipa kawkhuk ah a ke ding a; kawkhuk sung a kipan a pawt khetou mi thang ah a awk ding; tunglam a tohlette lah hon in a om ngal a, lei kingaknate lah a ling hi.

¹⁹Lei lah a kitam gawpvek a, lei lah hihman in a omvek a, lei lah nakpitak in a ling hi.

²⁰Lei lah mi zukham bang in a hoi dongdong ding a, bawkta hawt bang in a kihot ding; a tatlekna lah a tung ah giktak in a om ding a, huchi in a puk ding a, a thou nawnta kei ding hi.

²¹Huan, huai ni chiang in hichi ahi ding a, TOUPA’N tunglam a mi tungnung pawl lian pipite a gawt ding, lei a lei kumpipate toh.

²²Hentate kawkhuk a pikhawm a a om bang un huaite pikhawm in a om ding ua, suangkulh a khum in a om ding uh, ni sawttak nung in gawt in a om ding uh.

²³Huai hun chiang in tung a kha zumtakin a om ding a, tung a ni zahlaktak in a om ding; sepaihte TOUPA lah Zion tang leh Jerusalem khua ah leh, a upate ma ah, thupitak a kumpi a om ding ahi ngal a.