Read Paite Chin ISAI 25 Bible Online

ISAI 25 - Paite Chin bible

ISAI 25

¹TOUPA aw, nang ka Pathian na hi a; k’on pahtawi ding, na min ka phat ding; thillamdang tak, nidanglai a vaihawmte, ginomtak leh thutak in na hih ngal a.

²Khopite lei vum in na suaksak a; a kulhte uh leng na hihsia hi; gamdang mite kumpipa in leng khua lou in na bawl ngal a; chik chiang mah a lam in a om nawnta kei ding.

³Huaiziak in mi hat mahmahte’n a hon pahtawi ding ua, nam kihtakhuai mahmah khopi in a honkihta ding uhi.

⁴Mi kihtakhuaite hu huihpi in bang a sawn okok lai bang a a hongom chiang in, nang zaw mi genthei ading in bukna, tagah mangbang lai ading in bukna, huihpi lak a kihumbitna, nisa liahna na hi ngal a.

⁵Mun keu a khaw lum na daisak zel bang in, gamdang mite husa na daisak hi; kholum meiliah a daihsak a a om bang in, mi lauhuaite thom daihsak ahi ding.

⁶Huan, hiai tang ah sepaihte TOUPA’N michih ading in thil thaute, uainte a te toh kidiah, thil thau mahmah guhngek a dim, uainte a te toh kidiah hoihtak a khit siang in Ankuang a lui ding hi.

⁷Huan, khuhna mi tengteng tung a khiak, puanzak nam tengteng tung a zak hiai tang ah a hihse ding hi.

⁸Sihna a valh denta; TOUPA Pathian in mi tengteng mai a kipan khitui a nulsiang ding a; a mite min siatna lah leitung luah tengteng a kipan in a lamang ding: TOUPA’N huai a chita hi.

⁹Huai ni’n, Ngai un, hiai i Pathian ahi; amah i ngakngak ua, huchi in a hon hondam ding: hiai TOUPA ahi; amah i ngakngak ua; a hotdamna ah i kipak in i nuam ding uh, a chi ding uhi.

¹⁰Hiai tang ah TOUPA khut a kinga ding a, Moab, buhpawl ek kua a sikden a a om sek bang in, amah mun ah sikden a om ding ahi ngal a.

¹¹Huchi in tuiliaumi in tuiliau ding a a khuat bang in, huai lak ah a khut a zakkhe ding a: a kisaktheihna lah a khut lepchiahna toh in TOUPA’N a koihniam ding.

¹²Huan, na kulh bangte insang kulhpi hihchim in, a koihniam a, lei ah, leivui pha hial in a puksakta hi.