Read Paite Chin ISAI 26 Bible Online

ISAI 26 - Paite Chin bible

ISAI 26

¹Huai ni chiang in Judahte gam ah hiai la a sa ding uh. Khopi kiptak i nei ua: aman hotdamna kulh bangte leh kulhpite a ding in a sep ding hi.

²Nam diktat thutak zui nam a lut theihna ding in kulh kongkhakte hong un.

³Na tung a lungsimnga mi, nangmah a honmuan ziak in, muanna kim in na kem ding.

⁴TOUPA tangtawn in muang un: TOUPA, Jehovah ah lah tangtawn suangpi a om ngal a.

⁵Aman sangpi a omte a hihniam a khopi sangpi mah: a koih niam a, lei pha in a koih niam a, leivui pha hial in a puksak hi.

⁶Khe in a sikden ding; gentheite khe leh tagahte kalsuan in.

⁷Mi diktat lampi lah dikna ahi a; nang lungtang diktat pu in mi diktat lampi na hihmam sek.

⁸Ahi, TOUPA aw, na vaihawmna lampi ah k’on ngak uhi: kou hinna deih zaw na min loh leh nangmah theihgigena ahi.

⁹Zan chiang in ka hinna in nangmah a hon ngai a; ahi, zingkhang in ka sung a ka kha om in ka honzong ding hi: na vaihawmnate lei a a hongom chiang in khovel a omte’n diktatna lah a sin zel ngal ua.

¹⁰Mi thulimlou deihsak in om mahleh, diktatna a sin tuansam kei ding: dikna gam ah diklou tak in a hih ding hi. TOUPA thupina a mu tuankei ding.

¹¹TOUPA, na khut lah zak in a om a, himahleh amau a mu tuankei ua: himahleh mite adia na phatuamngaihna a mu ding ua, a zumta ding uh; ahi, nang hondoute mei in a kangmang ding.

¹²TOUPA nang lemna n’on sehsak ding: nang ka nasep tengteng uh n’on sepsak hi.

¹³TOUPA ka Pathian uh aw, nang kia hilou in kumpipa dangte’n leng ka tung uah thu a neikhinta ua, himahleh nangmah mah panpih in na min ka louta ding uh.

¹⁴Amau lah a sita uh a, a hing nawn kei ding uh; a mangta ua, a thou nawn kei ding uh; huaiziak in nang amau gawt in na hihsia a, a theihgigena teng uleng na hihmangta hi.

¹⁵Hiai nam na pungsakta a, TOUPA aw, hiai nam na pungsak a: nang pahtawi in na omta: hiai gam a gamgite na hihlian hi.

¹⁶TOUPA, a dahlai un a honzong ua, a mau na thunun chiang in a thum zel uhi.

¹⁷Numei naupai, neih hun naita bang in; TOUPA aw, kou na ma ah ka om uhi.

¹⁸Nau ka pai ua, ka na ua, huih banglel ka nei uh; lei ah lah tatkhiakna lam himhim ka ngahkei ua; khovel a omte lah a puksam kei uhi.

¹⁹Na misite a hing nawn ding ua; ka mi luangte a thou nawn ding uh. Leivui a omte aw, halh unla, nuamtak in lasa un: na daituite khovak daitui bang ahi a, lei in misite a paikhe ding hi, chih.

²⁰Kisa un, ka mite aw, na dantan sungte ah lut unla, na kongkhakte uh kikhak khum un: lunghihlouhna a ven masiah mitphiatkal lel leng bu un.

²¹Ngai un, TOUPA, a gitlouhna ziak ua lei a omte gawt ding in a omna a kipan a hong pawtkhe ding hi: lei mah in a sisan a hihlang ding a, a mi a thahte uh a khuhta kei ding hi.