Read Paite Chin ISAI 27 Bible Online

ISAI 27 - Paite Chin bible

ISAI 27

¹Huai ni chiang in TOUPA’N, a namsau hoihtak a hiam, lianpi, muanhuaitak in, leviathan gulpi hattak leh leviathan gulpi kivial ngeingoi a gawt ding a, tuipi a dragon om leng a that ding hi.

²Huai ni chiang in: Uain grephuan khat, huai pahtawi in lasa un.

³Kei TOUPA lah a vengpa ka hi a; mitphiatkal teng in tui ka buak ding a, kuamah in a khoihlouh ding un sun leh zan in ka veng ding.

⁴Kei ah hehna a omkei hi: loulingnei leh khaulingneite’n hondou in honsual le u aw! Amau sual din ka kuan ding a, mun khat ah ka halkhawm ding hi.

⁵Ahihkeileh, hon kileppihna ding in ka hatna len hen: ahi, hon kileppih hen.

⁶Hun hontung ding ah Jakobte’n zung a kha ding ua; Israelte’n zung a kha ding ua; Israelte a mum un a pak ding uh: huchi in leitung gah in a dimsak ding uhi.

⁷Amah vawte a vuak bang in amah a vaw sam ahia? Ahihkeileh, amah thahte thahna bang in amah thah in a om hia?

⁸Amah na paimangsak lai in a hunlel in amah na sel a: suahlam huihnun ni’n a hu thupitak in amah a mutlengta hi.

⁹Huaiziak in hiai in Jakobte thulimlouhna silsiang ahi ding a, hiai a khelhna uh pai mangpihna gah ngen ahi: Asherim hiam, gimlim maitamte hiam ding nawnlou ding khop in maitam suang tengteng suangpak den khap bang in a bawl uhi.

¹⁰Khua kulhpi nei lah a lungzuang a, omna nutsiat leh paisan, gamdai bang ahi: huai ah bawngnou a ta ding a, huailai mah ah a kual ding a, a selte a ne ding.

¹¹A hiangte lah a vuai chiang un khiah in a om ding a; numeite a hongpai ding ua a hal ding uh: amau lah theihtheihna himhim neilou mi ahi ngal ua: huaiziak in amau bawlpa’n amaute a hehpih kei ding a, amaute sutuahpan amaute deihsakna himhim a neikei ding hi.

¹²Huai ni’n hichi ahi ding a, TOUPA’N, Lui a kuang dim a luang zoizoi a kipan in, Aigupta luita pha in, a gah a satkhe ding a, huchi in, Israel suante aw, khatkhat a pikhawm in na om ding uhi.

¹³Huai ni’n hichi ahi ding a, pengkul lianpi a mut ding ua: Assuria gam a mangthang dekdekte leh, Aigupta gam a delhkhiak a omte a hongpai ding ua: Jerusalem khua a tang siangthou ah TOUPA a be ding uhi.