Read Paite Chin ISAI 28 Bible Online

ISAI 28 - Paite Chin bible

ISAI 28

¹Ephraimte zukhamhatte kisaktheihna lallukhu tung leh, a kilawmna uh thupi pak tullel laitak, uain thazoh a omte guam hausa tak lutang tung a om a tung a gik hi!

²Ngai in, TOUPA’N mi hat thilhihtheitak a nei a: aman, gial thupitak ke phuakphuak, huihpi thil hihse lemlum bang leh, tuilian thupi let zuazua bang mai in, lei ah a pai ek ding.

³Ephraimte zu khamhatte kisaktheihna lallukhu lah sikden in a om ding a:

⁴A kilawmna uh thupi paktul laitak, guam hausatak lutang tung a om, nipi ma a theipi min masapen, a en mi in a muh a, a khut a a omtak a a nekkhit sek bang ahi ding hi.

⁵Huai ni chiang in sepaihte TOUPA tuh, thupina lallukhu leh, kilawmna lukhute, a mi omsunte ading in ahi ding:

⁶Vaihawm ding a tu ading in vaihawmna khate, kulh kongkhak bul a hon sualte nangkikmite ading in hatna ahi ding.

⁷Himahleh huaite leng uain ziak in a kipekpek ua, zu ziak in a hoihoi ua: siampute leh zawlneite leng zu ziak in a kipekpek ua, uain valhkhit in a om ua, zu ziak in a hoihoi ua: kilakna thute ah a kipekpek ua, vaihawmna thu ah a hoihoi uhi.

⁸Mun siang mahmah omlou khop in dohkan tengteng lah luak leh thilnin in a dim hi.

⁹Aman theihna lam a kua ahia a sinsak ding? Thukhah leng aman kua ahia a theihsak sin laitei? Nawinek tawptungte leh nawi neksak nawnlouhte ahi ding uam?

¹⁰Thuzohna thu tung a thuzohna thu chian touh, thuzohna thu tung a thuzohna thu chian touh: dan tung a dan chian touh, dan tung a dan chian touh: hiai ah tawmchik, huai ah tawmchik chih ngenta a hih ziak in.

¹¹Ahi, muk lamdang pumi zang in, pau tuam in hiai mite kiang ah thu a gen zawta ding:

¹²Hiai lah khawlna ahi a, tawlte khawlsak un: hiai lah kihihhalhna ahi, a chihte: himahleh amau a ngaikhe nuam kei ua.

¹³Huaiziak in, a pai ua, a thal a a puk ua, a kitap gawp ua, thang a a awk ua, mat a a om theihna ding un, TOUPA thu amaute ading in, thuzohna thu tung a thuzohna thu chian touh, thuzohna thu tung a thuzohna thu chian touh, dan tung a dan chian touh: dan tung a dan chian touh; hiai ah tawmchik huai ah tawmchik chih ngen a ahi mai ding hi.

¹⁴Huaiziak in, mi muhsithatte aw, hiai mite, Jerusalem khua a omte, vaihawmsakte aw, TOUPA thu za un:

¹⁵Sihna toh thu i khungta, Sheol ah thu i kichiamta; vuakna tuilian a luansuak hun chiang in leipha in zaw a luang kei ding; zuauthute i kihumbitna ding in i zang ua, zuau nuai ah lah i buta ngal ua, na chih ziak un.

¹⁶Huaiziak in TOUPA Pathian in hichi in a chi ding; Ngai in, suang, suang ettelsa, a kil a suang manphatak phum kip mahmah, Zion ah suangphum ding in ka lem hi; a gingtami zaw a kin kei ding.

¹⁷Vaihawmna diktat a tansakna khau ding in ka zang ding a, diktatna lah a ulum khai ding in ka zang ding a, gial in kihumbitna zuau thute a phiatmang vek ding a, tuite’n lah bukna a tum ding.

¹⁸Huan, sihna toh na thu khun uh a kiphel ding a, Sheol toh na chiam uleng a piching kei ding, vuakna tuilian a luan suak hun chiang in. Huai hun chiang in a sik den in na om ding uhi.

¹⁹A luan suak peuhmah chiang in nou a hon lazel ding; a zingsang a zingsang in, sun leh zan in, a luang suak sin ngal a; thukhah omdan theihsiam lah thil mulkimhuai ngen ahi ding, chi in.

²⁰Lupna lah khekhuanna ding in a tom lozen a, puan thuah lah lukhuhna ding in a neu lua hi.

²¹A nasep, a nasep lamdang a sep theihna ding leh, a thilhih, a thilhih lamdang a zuih theihna ding in, TOUPA Perazim tang a a thou bang in a thou sin ngal a, Gibeon guam a a heh bang in a heh sin hi.

²²Huchi in mi muhsit chingte hi nawn kei un, huchilou in zaw na kolbutte uh muanhuaitak in a bawl kha ding uh; tawpna, tawpna tung ngei ding a seh, lei pumpi tung a a tunsak ding. TOUPA, sepaihte TOUPA a kipan in ka za hi.

²³Bildoh unla, ka aw za un; ngaikhia unla, ka thugen za un.

²⁴Leiletmi in chi thehna ding in lei tatlaklou in a let ngei ahia? A lei khalte tatlaklou in a khenkham in a hihzan ngei ahia?

²⁵A tung a tohtam khit in mohurite a thehdalh ka hia? Zirate leng a theh ka hia? Buhte a vual in, huitbuhte leng a mun sehsa ah, vaibuhte leng a nawlzul ah a tuh sek ka hia?

²⁶A Pathian in lah amah diktak in a thuzoh in a sinsak ngal a.

²⁷Mohuri lah buh chilna khawl in a chil ngei ngal kei ua, zira tung ah leng kangtalai khe a tuksak ngeikei uh; mohuri zaw chiang in a khen ua, zira bel khetbuk in a khen zaw sek uhi.

²⁸Tanghou bawlna buh gawizan in a om a, aman tangtawn in a vaw kei ding a, a kangtalai khe leh a sakolte’n dalhsak mahleh, a gawizan sak ngeikei hi.

²⁹Huaite leng sepaihte TOUPA, lemtheihna a mi lamdang mahmah leh pilna a mi hoih mahmah a kipan a pawt ahi hi.