Read Paite Chin ISAI 29 Bible Online

ISAI 29 - Paite Chin bible

ISAI 29

¹Ariel, Ariel, David puanin kaihna mun! kum ah kum gawm inla; ankuangluinate hongtung nawn hen;

²Huai hun chiang in Ariel ka lungzing sak ding a, huchi in sunna leh kahna a om ding; huan amah kei ading in Ariel bang ahi ding.

³Huan, nangmah sual tum in na kim ah k’on giahkhum ding a, nangmah sual ding in umsuakna insangte ka bawl ding.

⁴Huchi in, puksak in na om ding a, leinuai a kipan in thu na gen ding a, na aw lah leivui lak ah awlawl in a gingkhe ding; na aw dawi aisansiam zawl aw bang in leinuai a kipan in a pawt ding hi, na pau leivui lak a kipan in a hongpawt siausiau ding hi.

⁵Himahleh nang hondou mipite zaw leivui nel mahmah bang in a om ding uh, mi kihtakhuai mipite leng buhsi mangthang sekte bang in a om ding uh; ahi, huai mitphiatkal lou in a hongom guih ding hi.

⁶Vangingte, zinlingte, ging thupi mahmahte, pingpeite, huihpite, hulmang thei mei in amah sepaihte TOUPA gawt in a om ding hi.

⁷Huchi in Ariel dou nam tengteng mipite, amah leh a insang sualmi tengteng leh amah hih lungzingte tengteng, ihmu mang banglel ahi ding uh, zan a kilakna banglel.

⁸Mi gilkial in mang a neih in an a ne a, himahleh a khanglou a a bahlai in tui a duhlai bang ahi ding hi; Zion tang sual, nam leh mipite, huai bang ahi ding uhi.

⁹Ding kinken unla, lamdang sa un, kituam unla, mittaw in om un; a kham ua, himahleh uain ziak ahi kei; a hoihoi ua, himahleh zu ziak ahi kei.

¹⁰TOUPA’N ihmut limna kha na tung uah a sungbua a, zawlneite na mit uh a mitsi sak a, na lu uh, mutheite, a khuhta ngal a.

¹¹Huchi in kilakna himhim nou ading in laibu bilhkhum bikbek bang ahita, mite’n laisiammi kiang ah, hehpih in huai sim in, chi in a pia ua, aman, ka sim theikei, bilhkhum bikbek ahi, a chi a;

¹²Huan, laibu tuh laisiam loumi kiang ah, Hehpih in hiai sim in, chi in a pia ua, aman, laisiam ka hi kei, a chi hi.

¹³Huchi in, TOUPA’N, hiai mite’n a hongnaih ua, a kam un leh a muk un a hon pahtawi ua, himahleh a lungtang uh kei a kipan in a gamla a, a hon launa uleh mihingte thupiak min a sinsak lel uh ahi;

¹⁴Hiai mite lak ah thillamdang ka hih behlap ding, thillamdang, thillamdang mahmah; huchi in a mipilte uh pilna a mang ding a, a mi teite uh teina sel in a om ding, a chi hi.

¹⁵A thutup uh TOUPA lak a sel ding a thuktak zongmite tung a gik hi! a thilhihte ulah mial nuai ah a om a, kuan a honmu dia? Kuan a honthei dia? a chi uhi.

¹⁶Thilte na lumlet vek uh! Belvelpa bellei banglela seh in a om sin ahia. Thil bawl in a bawlpa tung ah, amah honbawl ka hi sam a, a chih? Ahihkeileh, thil suktuaha om in a sutuahpa tungthu ah, theihna himhim a neikei, a chih?

¹⁷Sawtlouchik nung in ahi ka hia, Lebanon lei hoih tak mun a suahsak in a om sina, lei hoih tak mun lah gammang a seha a om sin?

¹⁸Huai ni’n bengngongte’n laibu thute a bil un a za ding ua, mittawte’n mial nuai leh mial lak a kipan in a mu ding uhi.

¹⁹Thunuailutte’n leng TOUPA ah a nopna uh a khangsakta ding ua, mihingte lak a gentheite Israelte Mi Siangthou ah a kipakta ding uh,

²⁰Mi lauhuai bangmahlou a bawl ahita a, mi simmohhat a daita, thulimlouhna ngaklah tengteng hih manthat in a omta uhi.

²¹Huaite’n thu in mite thil hihkhial in a bawl ua, kulh kongpi ah taihilhmi awkna ding in thang a kam ua, mi diktat bangmahlou in a nawlkhin uhi.

²²Huaiziak in TOUPA, Abraham tan pen, Jakob inkawte tungthu ah hichi in a chi hi: Jakobte zaw tuin a zahlak takei ding ua, a mai uh a mual nawn sam kei ding.

²³A ta uh, ka khut suakte, a lak ua a muh un, ka min a siangthousak zawta ding uh; ahi, Jakobte Mi Siangthou a siangthousak ding ua, Israelte Pathian lah a kihta ding uhi.

²⁴Kha a vakmangte’n leng a hon theisiamta ding ua mi phunhatte’n sinsak thu a sinta ding uhi.