Read Paite Chin ISAI 3 Bible Online

ISAI 3 - Paite Chin bible

ISAI 3

¹Ngai dih ua, TOUPA Sepaihte TOUPA’N, Jerusalem a kipan leh Judah a kipan a muanpi uleh a chiang uh a muanpi uh an tengteng leh a muanpi uh tui tengteng, a laksak hi.

²Mi hat leh kidousiamte toh; vaihawmmi leh zawlnei leh, aisansiam leh, upate toh;

³Sawmnga heutu leh, mi zahtakhuai leh, lemtheimi leh, khutsiam leh thugensiamte toh.

⁴Huchi in a mi liante kiang ah naupangte ka pe ding a, naungekte’n a tung uah vai a hawm ding uh.

⁵Huchi in, mite nuaisiah in a om ding ua, michih kinuaisiah in a om ding uh, michih amau invengte toh kinuaisiah in a om ding uh: naupang upa tung ah kisathei tak in a om ding ua, mi thulimloupi nangawn mizahtakhuai tung ah kisathei tak in a om ding.

⁶Mi’n a pa inn a unau len in, “Nang silhlehten na nei a, ka vaihawmtu un om inla, hiai siatna na khut ah om heh” a chih chiang in:

⁷Huai chiang in amah a pau khe ding a, “Kei zaw bawlhoihtu in ka omkei ding hi; ka inn ah nekding a omkei a, silhlehten leng a omkei: mite vaihawmpa in n’on bawl kei ding” chi in.

⁸A thupina mit vuisak ding a a pau uleh a thilhihte uh TOUPA dou lam a hih ziak in Jerusalem a se khin a, Judahte a pukkhinta uhi.

⁹A mel latdan in amau a hek tawm a; a khelhna uh Sodom bangtak in a langsak ua, a im kei uh. A tung uh gik e! thil hoihlou in a kithuk tawm ngal ua.

¹⁰Mi diktat thu ah a hoih ding uhi, chi un; a thilhih gahte ulah a ne sin ngal ua.

¹¹Migiloute tung a gik hi! Lah a se sin ngal ua; a khut ua thilhih thukna a kiang ua piak a hih ding ziak in.

¹²Ka mite zaw, amau nuaisiahtute naupangte ahita ua, numeite’n a tung uah vai a hawmta uhi. Ka mite aw, nou honpite’n a hon pikhial ua, na paina lamte a hihse sek uhi.

¹³TOUPA genpih ding in a hong dingkhia a, mite vaihawm ding in a hong dingta hi.

¹⁴TOUPA’N a mite upate tung ah leh amau mi liante tung ah vai a hawm ding: TOUPA Sepaihte TOUPA’N, “Noute na hi uh, grephuan negaite; mi tagahte a kipan a sumlak na innte uah ahi a om:

¹⁵Bang achia ahia ka mite na at ua, tagahte mai na gawizan uh?” a chi hi.

¹⁶Huailou in TOUPA’N, “Zion tanute kisathei tak a a om ua, dak vuauvuau leh mi en loplop a a pai ua, a pai un a pai lohloh ua, a khete uh a suan ging thuapthuap ziak un.

¹⁷TOUPA’N Zion tanute luzang ah meima khem a omsak ding a, TOUPA’N a zahmohte uleng a dawksak ding” a chi hi.

¹⁸Huai ni chiang in TOUPA’N a kizepna hoihnate uh a laksak ding a, khebulhte, len lukhute, hakkolte;

¹⁹Bilbah kai ngiahngiahte, taute, kikhuhna puante;

²⁰Lutang puante, khebulh khainiangte, kawng a tente, gimlim bawmte, kikaunate;

²¹Minsawnna zungbuhte, nakbulhte;

²²Ankuangluina vante, puanak tualte, puan silhte, kawljalte;

²³Limlangte, puanmalngatte, dialte, kituamhoihna puante.

²⁴Thau namtui sik in thil muat a om ding; kawnggak sik in khauzen a om ding; sam mam sik in talkolh a om ding; puan kilawmtak sik in saiip puan a om ding: melhoih sik in meikang pawn a om ding hi.

²⁵Na mite namsau vatpaih in a om ding ua, na mi hat mahmahte kidouna ah a puk ding uh.

²⁶A kulh kongkhakte ah awm kitum in a kap ding ua; a hawm a nutsiat ahi ding ua, lei ah a tu ding hi.