Read Paite Chin ISAI 30 Bible Online

ISAI 30 - Paite Chin bible

ISAI 30

¹TOUPA’N, ta helhatte a tung uh a gik hi! Huaite’n mi a dong ua, kei lah a hon dong kei uh, a khelhna tung ua khelhna a behlapna ding un, khuhna in a khuh ua, ka kha thu in lah a khuh tuankei uh;

²Pharo hatna a kihatsak ding in leh, Aigupta lim bel ding in, ka kam dong tuanlou in Aigupta gam a paisuk tum in a kuan uhi.

³Huaiziak in Pharo hatna noute zahlakna ahita ding a, Aigupta lim na belh ulah na maizumna uh ahita ding.

⁴A miliante lah Zoan khua ah a om ua, a palaite lah Hanes khua a tungta ngal uhi.

⁵Amau adia phattuamna himhim neilou mi, huhna hilou, phattuamna neimi leng hilou, maizumna leh minsiatna hizawte, avek un a zumpih ding uh, a chi hi.

⁶Sim gam a sate puakgik, buaina leh lunglauna gam, humpinelkainu leh humpinelkaipa, guldekpak leh gul kuangleng thei pawtna, a sum uh sabiltung nou tungte ah, a gou uh sangawngsau nungvumte ah pawsak in, amau adia phattuamna neilou mite kiang a piak ding in, a pai ton dapdap uhi.

⁷Aigupta in lah phatuam lou tak leh panna neilou tak in a panpih zel ngal a; huaiziak in ahi, amah, Rahab tu kinkennu, ka chih.

⁸Tuin pai inla, huaite a ma ua laigelhna pek ah gelh inla, laibu ah leng gelh in, tunung a tangtawn donga ding a hihtheihna din.

⁹Huaite lah mi helhatte, ta zuautheite, ta TOUPA dan ngaikhe nuamloute ahi ngal ua;

¹⁰Mutheimite kiang a, mu kei un, zawlneite kiang a, Thildikte honhilh kholkei un, thil nuam lam ka kiang uah gen un, khemna thu gen un, khemna thu gen khol un;

¹¹Lampi lou ah pai un, lamsik ah pial un, Israelte Mi Siangthou ka ma ua kipan hihmang un, chi ngitngette.

¹²Huaiziak in Israelte Mi Siangthou in hichi in a chi a, hiai thu na muhsit ziak un leh nuaisiahna leh phengphitna na muan ua, a tung ua na kingak ziak un.

¹³Hiai thulimlouhna noute ading in suangbang sangpi selai, chim dekdek, puak eng ong, thakhat a mitphialkal lou a segawp ding bang ahi ding hi.

¹⁴Huchi in belvelmi bel a kitam gawpsak bang un, hawi om hetlou a keknen in, a themnen lak ah belpei thuk a mei lakna ding hiam tuikhuka tui dipna ding omlou khop in, a kitam nensak ding, chi in.

¹⁵TOUPA Pathian Israelte Mi Siangthou in hichi in a chi hi, Kiknawn a khawl a om in hotdam in na om ding ua; muangtak a omna ah leh ginna omna ah na hatna uh a om ding, chi in; himahleh nou na ut kei uhi.

¹⁶Hilou e, sakol tung a tuang in i tai zozot ding uh, na chi zawsop ua, huaiziak in na tai zozot ngei ding uh; Thil hattak tung ah i tuang ding, na chi ua; huaiziak in nou hondelh ding lah hattak ahi ding uh.

¹⁷Mi khat phawn in sang khat a taikek ding ua; mi nga phawn in na taikek ding uh; a tawp in mualvum a puankhai khai bang leh, tang tung a chiamtehna om bang a nutsiat in na om ding uhi.

¹⁸Huaiziak in noute TOUPA’N a hon hehpih theihna ding in a honngak ding a, huaiziak in noute a hon lainat theihna ding in pahtawi in a om ding; TOUPA lah vaihawm diktatna Pathian ahi ngal a; amah ngakte tengteng in nuam a sa uhi.

¹⁹Mite Jerusalem a Zion ah a om ding ahi ngal ua; na kap nawn kei ding uh; na kahna husa uah aman a hon hehpih mahmah ding a; a zaktak in a hon dawng ding hi.

²⁰TOUPA’N lungkhamna tanghou leh haksatna tui nou honpe mahleh, nou hon sinsakmite a kibu nawn kei ding ua, na mit un nou hon sinsakmite a mu zawta ding hi;

²¹Huan, taklam a na pial un hiam, veilam a na pial un, na bil un na nunglam ua thu, "Hiai lampi ahi, hiai ah pai un," chi in, a za ding hi.

²²Na dangka uh milim bawl dangka chi a zepna leh, na dangkaeng uh, milim sun dangkaeng tui a luanna na buahsak ding ua; thil nin bang in na paita ding ua, a kiang ah, Paimang in! na chi ding uh.

²³Huchi in, aman na buhchi uh lei a na tuh ding uh ading in vuahtui a pe ding a; lei a thilpoute leng an din a peding, huai lah hoihtak pung tak ahi ding; huai ni chiang in na ganta uh gantatna mun zapi ah a ta ding uh.

²⁴Bawngtal leh sabengtungnou leilette’n an chisoh, ninluahna leh phazah a hihsiangsa a ne ding uh.

²⁵Kithahna thupitak ni a galvenna singte a chip ni’n, tangsang teng ah leh mualvum sangteng ah luipite leh luite tuiluang a hongom ding.

²⁶Huailou leng TOUPA’N a mite kihehna a tuam a, a liamna ma uh a damsak ni chiang in, khavak nivak pha in a omta ding a, ni vak a mun sagih in, ni sagih vakpha in a omta ding hi.

²⁷Ngai in, TOUPA min, a hehna kuang zuazua in, meikhu sahtak in a zamtou lak ah, gamlapi a kipan in a hongpai hi; a mukte lunghih louhna in a dim a, a lei thil katmanghat mei bang ahi.

²⁸A hu lah, manna lawhpi a namchih sep ding in, lui ngawng chiangpha hial a a kuang a let bang ahi; michih kam ah pikhelh sakna kaihgingna khau a om ding.

²⁹Zan a zehtan siangthou a zeh a tanlai ua la a sak bang un, la a sa ding ua; TOUPA tang a Israelte Suangpi kiang tung ding a tamngai toh a pailai ua lungtang nopsakna a nei bang un lungtang nopsakna leng a nei ding uhi.

³⁰Huchi in, TOUPA’N a aw thupitak a kizasakta ding a, a hehna thupitak leh thil katmang ching meikuang in, a huihpi leh vuahpi leh gial in, a khut khakdan a ensakta ding.

³¹TOUPA aw ziak in Assuria mi, khetbuk a mi khen nakpa, kitapzan sak a om ding ahi ngal a.

³²Amah lah chiang sehsa a TOUPA’N a zep peuhmah chiang in khuangtate leh kaihgingte toh a zep ding; a chianglik a kisualnate ah amau a sual ding.

³³Tophet khat lah tuma a na bawlkholhsa ahi ngal a; ahi, kumpipa ading in bawlzoh siang ahi a; thutak zatakin a bawl a; a thil sekkhawm mei leh sing tamtak ahi a; TOUPA hu, kat luiluang bang in, a kangsak zuazua hi.