Read Paite Chin ISAI 31 Bible Online

ISAI 31 - Paite Chin bible

ISAI 31

¹Aigupta gam a panpihna zong ding a hohsuk a, sakolte tung a muang a, a tam ziak ua kangtalaite leh a hat mahmah ziak ua sakol tungtuang mite muang a Israelte Mi Siangthou lam enlou a, TOUPA leng dongloute zaw a tung uh a gik hi!

²Dong kei mahle uh amah leng piltak ahi, thil hoihlou a hon tungsak ding a, a thute a khel nawn kei ding, thil hoihlou hihmite inkuan sual ding in a thou zaw ding a, khialte panpihna dou ding in a thou ding hi.

³Aigupta mite zaw, Pathian ahi kei ua, mi lel ahi uh; huchi in TOUPA’N a khut a zak hun chiang in a panpihtu pen a pai ekek ding a, a panpihpen leng a puk ding a, avek un a mangthang khawm ding uhi.

⁴TOUPA’N lah huchi in ka kiang ah a chi ngal a. Humpinelkai leh humpinelkai lunlai in sa a khamlai in belamchingmi tamtak a sual ding in a sapkhiak in om mahle uh, a aw uh a lau kei ding ua, a bil ap ziak ua a kihtak tuanlouh ding bang in, sepaihte TOUPA zaw Zion tang ah a mual tung a sual ding in a hong paisuk ding hi.

⁵Vasate a bu tung ua a lengleng bang un sepaihte TOUPA’N Jerusalem khua a veng ding; a veng dia a tankhe ding a, a Paikan in a humbit ding hi.

⁶Israel suante aw, nakpitak a na helsansa lam uh nga nawnta un.

⁷Huai ni’n michih in amau dangka milimte, amau dangkaeng milimte, khelhna ding a amau khut a na kibawltawmte uh lah a paimang ding ua,

⁸Huai hun chiang in Assuria mi bel, mi namsau a puksak hilou in, namsau hihpuk sak hilou in, namsau hihpuk in a om ding a; namsau mite a hilou in, amah a gai ding; huan, namsau lak a kipan a taimang ding a, a tangvalte lah siahliaumi a hong hita ding uhi.

⁹Huchi in, a suangpi lah thil mulkimhuai ziak in a mang ding a, a miliante lah chiamtehna ziak in a buaita ding, chi in, TOUPA, a mei Zion a om leh, a haltuina mei Jerusalem a om in, a chi hi.