Read Paite Chin ISAI 32 Bible Online

ISAI 32 - Paite Chin bible

ISAI 32

¹Ngai in, kumpipa khat diktattak in kumpipa in a tu ding a, mi liante’n vaihawmna diktak in vai a hawm ding uh.

²Huchi in, mi khat huihpi lak a bukna mun bang, vuahpi lak a bitna mun, mun keu a tui luangte bang, gam tultak a suangpi lianpi nuamsa tak bang ahi ding hi.

³Huchi in a mute mit a mial kei ding a, a zate bil in a ngaikhe ding.

⁴Mi ngongtatte lungtang in theihna thu a theisiam ding a, dang-awkte lei teltak in a pau thei ding hi.

⁵Migilou mi thilphal a chi nawnta kei ding uh, milepchiah misiam a chi nawn kei ding uh.

⁶Pathian zahlouhna thilhih ding leh, TOUPA hekna dia thu diklou gen ding in, gilkialte sung hawmsak ding leh, dangtakte dawn ding hihmang ding in, migilou in lah gitlouhna thu a gen dia, a lungtang in thil a hihkhial ding hi.

⁷Mi lepchiah vante zaw hoihlou ahi a; tagahte’n thudik a gen un leng mi gentheite zuauthu a hihmang ding in aman lah thil gilou hih a ngaihtuah zel hi.

⁸Mi thilphal bel thilphal in thil liante a ngaihtuah a: huchi in thilphal lam thilte ah a om gige ding hi.

⁹Numei mawk omte aw, thou unla, ka aw ngaikhia un; tanu pilvangloute aw ka thugen ah bildoh un.

¹⁰Numei pilvangloute aw, kum khat leh ni bangzah hiam nung in na buaita ding uh; grep loh ding lah a om ngalkei ding a, grep lohkhawm ding ah leng bangmah a suak sam kei ding hi.

¹¹Numei mawk omte aw, ling un: mi pilvangloute aw, buaitak in om un; kisuah unla, vuaktang in kibawl unla, na kawng uah saiip puan teng un.

¹²Lou deihte ziak leh grep guigah nuamte ziak in a awm a tumtum ding uhi.

¹³Ka mite gam loulingnei leh khaulingnei in nopsakna inn tengteng leh nopsakhuai khopi tengteng tung ah a buak ding hi:

¹⁴Kumpipa inn paisan a om ding ahi ngal a; a mualpawng leh a galvenbuk tangtawn kawhawm ding leh, gam sabiltung kipahnate, ganhon tatna munte ahi ding;

¹⁵Tunglam a kipan a kha ka tung ua sun a a om a, gamdai leihoihtak mun a suah a, leihoihtak mun lah gammang bang a sim a hih mateng.

¹⁶Huai hun in vaihawm diktatna gamdai ah a teng ding a, diktatna leihoihtak mun ah a om ding.

¹⁷Huan, diktatna nasep kituahna ahi ding a, diktatna a thilpawt lah tangtawn a muangtak a omna leh kitheihchetna ahi ding.

¹⁸Huchi in ka mite bel galmuanga omna ah leh inkiptak leh khawlna mun muanhuaite a omta ding uhi.

¹⁹Himahleh gammang bel hihpuk ding in gial a ke ding a; khopi hihniam in a om ding hi.

²⁰Tui luanna piau a chi theh zel, bawngtal leh sabiltung khahzel te aw, nuam na sa uhi.