Read Paite Chin ISAI 33 Bible Online

ISAI 33 - Paite Chin bible

ISAI 33

¹Nang loh tuak ngeiloupi, a lok a pang, lepchiahtak a bawl tuak ngeilou pi, lepchiahtak a pang, na tung a gik hi. Mi loh na tawp hun chiang in nang leng loh na tuaksam ding hi; lepchiahtak a na hihkhit chiang in, na tung ah lepchiahtak in a hih ding uhi.

²TOUPA aw, hon hehpih in; k’on ngak nilouh uhi; zingsang teng in ka ban uh honghi inla, buai hun chiang in leng hon hondampa honghi in.

³Lum vengvung husa in michih a taimangta ua; nang na kisak hial chiang in namchih hihdalh in a omta uhi.

⁴Na sum uh gallak a lak ding lung in thil a nek dundun bang in nekgaih in a om ding; khaupete a tawm duamduam uh bang in amaute sum tung ah a tawm duamduam ding uhi.

⁵Toupa tunglam ah tawisang in a omta hi; aman Zion vaihawm diktak leh diktatna in a dimsakta hi.

⁶Na damsung in omkipna a om ding a, hotdamna, pilna, theihna a om kikeih ding; TOUPA launa a gou ahi hi.

⁷Ngai in, a pasalphate uh pawlam ah a kikou ua; kituahna palaite a kap hawhaw uhi.

⁸Lamliante a mualta ua, mizin vialvakte a om nawn kei uh; aman thukhun a bohsia a, khuate a musit a, mi khawk a sa kei hi.

⁹Gam a kap in a gim a; Lebanon a zum in a vuai a; Sharon gamdai bang ahita; Bashan leh Karmel in a nah uh a singkhia uhi.

¹⁰TOUPA’N, tuin ka thou ding a, tun ka kisa ding a, tun tawisang in ka omta ding.

¹¹Lou keu naupai in na pai ding ua, buhpawl na suang ding uh; na hu uh noumau kangmang ding mei ahi.

¹²Michih lah chinai suang hal bang, loulingnei vatsa mei a a paih bang uh, a chi ding uh, a chi hi.

¹³Gamlapi a omte aw, ka thilhih bil in za un; naichik a omte aw, ka thilhihtheihdan thei un.

¹⁴Zion a migilou omte’n a lau ua; Pathian zahlou mite linna in a manta hi. I lak ua kua ahia thil katmang ching mei kiang a om ding? I lak uah kua ahia tangtawn a kang zoizoi kiang a om ding?

¹⁵Diktattak a om a, diktak a gen mi; nuaisiahnate punna himhim bangmah a ngailou a, golhna la nuamlou a bil hum a, gilou himhim en nuamlou a mitsi zel mi;

¹⁶Huai mi tunglam ah a om ding a; a kidalna munsang suangpi kidalnate ahi ding; a an a kiang a piak ahi ding a, a tuite a om ngeingei ding hi.

¹⁷Na mite’n kumpipa a kilawmna in a mu ding a, gam kiphalh zatak a hon en ding uhi.

¹⁸A simmi koi a omta ahia? Siahliau tehmi koi a omta ahia? Galven insangte simmi koi a omta ahia? chi in, na lungtang in thil mulkimhuai mahmah na ngaihtuah ding.

¹⁹Mihangtak, pau giltak na theihtheih louh a pau mite, pau tuam na theihsiamlouh a pau mite, na mu nawnta kei ding.

²⁰I zehtanna khopi Zion en dih; na mit in Jerusalem omna muanhuaitak, puanin chikchiang a leng suanlouh ding, kaihgakna khet chikchiang a leng bohlouh ding, a kaihna khau himhim kitatlou ding bang, a mu ding hi.

²¹Huai ah TOUPA, lui zapipi leh luitate omna mun, thupitak in i kiang uah a omzaw ding; huai tui tung ah kidouna long lianpi kalhna chiang neite a pai kei ding a, long lian thupitak in leng a kheng sam kei ding hi.

²²TOUPA lah i vaihawmpa ahi a, TOUPA lah dan hon pepa ahi a, TOUPA lah i kumpipa ahi; aman a hon hondam ding hi.

²³Na khaute kolsak in a om ding a; a puanzak peu bul uh a kipsak theikei ua, puanzak lah a zak theikei uh; huaitak in gallak sum tampi hawm in a om a; khebaite’n leng gallak sum a lata uhi.

²⁴Huai khua a mi om in, ka chi a na, a chi kei ding a, asung a mite khelhna ngaihdam in a om ding uhi.