Read Paite Chin ISAI 34 Bible Online

ISAI 34 - Paite Chin bible

ISAI 34

¹Namchihte aw, bil a za ding in hongnai un; michihte aw, ngaikhia un; leitung leh asung a om tengteng in bil in za uhen; khovel leh asung apat pawt tengteng toh.

²TOUPA’N nam chiteng tung a lungkimlouhna nei in a sepaihte uh tengteng tung ah lah hehna a nei ngal a; amau a hihmang vek a, thah din a peta hi.

³A lak ua thah a omte paihkhiak in a om ding ua, a luang namsia uh a paitou vutvut ding a, tangte a sisan ua zulsak in a om ding uhi.

⁴Van a omte tengteng hihman in a om ding ua, laibuzial a zial bang un van zial in a om ding a, a omte tengteng, grepgui a kipan a nahvuai a pulh bang in leh, theipi kung a kipan a nahvuai a pulh bang in a vuai khin un a pulh vek ding uhi.

⁵Ka namsau in van ah taitak in a dawnta ngal a, ngai in, huai vaihawm ding in Edomte tung ah leh ka hamsiat mite tung ah a ke ding.

⁶TOUPA namsau sisan in a tai ding a, thauna a thausak in a omta, belamnoute leh kelte sisan in, belampa gilthaute in; TOUPA’N Bozrah khua ah kithoihna a nei a, Edom gam ah leng thahna thupitak a nei hi.

⁷Gam bawngtalte leng kituak a satpaih in a om ding ua, bawngpate bawngtalte toh, a gam un sisan a kham ding a, a leivui uh thauna a thausak in a om ding.

⁸TOUPA phulak ni lah ahita ngal a, Zion selna lam thu a thukna kum.

⁹A luituite longnai dia suahsak in a om ding a, leivuite mei leh kat a suak ding a, a gam longnai kang a suak ding hi.

¹⁰Sun leh zan in mihsak ahi kei ding a; a meikhu lah tangtawn in a tungkah ding a; suan omlai siah a sia in a om nilouh ding a; tangtawn in leng kuamah in a ngap kei ding uhi.

¹¹Tuivagik leh sakuh in huai gam a tang ding ua; simbu leh va-ak huai ah a teng ding uh; siatna khau leh siatgawpna ulum a tung ah a khai ding hi.

¹²A mi hoihte uh gam uk ding in a sam ding ua, himahleh huai ah kuamah sap ding a omkei ding uh; a milian tengteng uh bangmah ahi kei ding uh.

¹³A kumpipa uh inn ah loulingneite a pou ding a, a kulhpi sung uah dailing leh lingnok a pou ding; sehalte tenna ding leh vasa ngawngsaute ading in inn umsung intual ahi ding hi.

¹⁴Huan, gamdai a, gamsate ngiate toh a kituak ding ua, sathak in a lawm a sam ding; ahi, zan thil lauhuaipi in huai ah omna a bawl ding a, amah ading in khawlna mun ding a mu ding hi.

¹⁵Huai ah simbu thupi in bu a bawl ding a, a tui dia, a keuh ding a, a op khawm ding; ahi, huai ah mute koppih neichiat in a omkhawm ding uhi.

¹⁶TOUPA laibu ah zong unla, sim un; huaite lak ah khat leng kimlou a omkei ding a, khat leng koppih neilou a omkei ding; amah kam ngei in thu a pia a, a kha ngei in huaite a pikhawmta hi.

¹⁷Aman lah amau ading in ai a sansak a, a khut a khau a teh in huai gam a hawmsak chiat a; tangtawn in a nei ding ua, suan omlai teng huai ah a om ding uhi.